Татарстан Президенты гадәттән тыш хәлләр министрлыгы бүлекчәләренә яңа техника тапшырды

Гадәттән тыш хәлләр министрлыгы бүлекчәләре бүген яңа янгын сүндерү машиналары һәм башка махсус техника алды. Һөнәри бәйрәмнәре алдыннан машина ачкычларын Татарстан Президенты Рөстәм Миңнеханов тапшырды.

2013 елда узачак Универсиаданың янгыннан иминлеген тәэмин итү максатларында Казан янгын сүндерү гарнизоны 36 техника берәмлегенә ия булды. 27 янгын автоцистернасы яңа тактик-техник сыйфатларга ия. Шулай ук, 3 автобаскыч, 1 штаб автомобиле, 1 төтеннән саклау автомобиле дә тапшырылды.

"Алдыбызда зур максат тора - Универсиаданы үткәрү, - дип мөрәҗәгать итте гадәттән тыш хәлләр министрлыгы хезмәткәрләренә Татарстан Президенты. - Бу дөнья дәрәҗәсендә узачак чара, аны үткәрүдә сезнең ролегез гаять мөһим".

Рөстәм Миңнеханов РФ гадәттән тыш хәлләр министрлыгына җитәкчелеген күрсәткән ярдәме өчен рәхмәтен җиткерде.

Татарстан Президенты машина ачкычларын тапшырганнан соң, "Машиналар буенча!" командасы яңгырады, йөртүчеләр двигательләрне кабызып сиреналарын яндырды.