Рөстәм Миңнеханов “Татнефтхиминвест-холдинг”ның Директорлар советы утырышын үткәрде

Бүген Татарстан Хөкүмәт йортында республика Президенты Рөстәм Миңнеханов рәислегендә “Татнефтхиминвест-холдинг” Директорлар советының быел беренче утырышы узды.
Холдингның генераль директоры Рафинат Яруллин ТР нефть, газ, химия комплексы предприятиеләренең 2012 ел эшчәнлеге нәтиҗәләре турындагы доклад белән чыгыш ясады. Якынча бәяләүләргә караганда, комплекс компанияләре мономер, полимер, каучук производствосында лидерлык позицияләрен, синтетик юу чаралары, шиннар, нефть җитештерү буенча әйдәп баручы позицияләрне саклады. Республика Россиядә нефть эшкәртү күләме буенча 6 нчы урынга чыкты. 2012 елда җитештерү күләме 7,2 процентка үсте. Нефть продуктлары һәм резин эшләнмәләр производствосында иң югары динамика күзәтелде. База предприятиеләре арасында җитештерү үсеше темплары буенча “Татнефть” шин комплексы, “Нәфис Косметикс”, “Казаноргсинтез”, “КВАРТ” лидерлар исәбенә чыкты, дип билгеләп үтте Р.Яруллин.
Россия Фәннәр академиясенең Югары молекуляр кушылмалар институты лабораториясе мөдире Владимир Юдин полимерлар һәм композицион материаллар механикасы мөмкинлекләре турында сөйләде. Рөстәм Миңнеханов ТР нефть химиясе предприятиеләренең лаборатория белән хезмәттәшлеген оештыруда кызыксынуын белдерде. Аның сүзләренә караганда, Татарстанда наноүзәк, полимер производствосы булу яңа материаллар өстендә эшләү мөмкинлеге бирә. Республика башлыгы эшче төркем оештырырга һәм эш өчен берничә тема сайларга тәкъдим итте.
Мәскәүнең “Лиотех” ҖЧҖ компаниясе генераль директоры Александр Ерохин литий-ион аккумляторлары җитештерү карары турында сөйләде. “Лиотех” – “Роснано”ның проект компаниясе, анда инвестицион литий-ион аккумляторлары җитештерү өчен зур күләмдә дәүләт инвестицияләре кертелгән.
“Киләчәк аккумляторның яңа чыганакларына бәйле”, - диде бу уңайдан Рөстәм Миңнеханов. Аның сүзләренә караганда, бу шәһәрдә экология проблемасын хәл итүдә мөһим. ТР Президенты “Лиотех”компаниясенә бергә эшләргә тәкъдим итте.
Утырышта Krauss Maffei Berstorff компаниясе ике юнәлештә тәкъдим ителде. Компаниянең Көнчыгыш Ауропа һәм БДБ илләрендә сату буенча җитәкче Зигфрид Ольденбургер шин җитештерүнең экструзион системалары турында белдерде. “Татнефть” генераль директорының беренче урынбасары Наил Маганов шин сәнәгате өчен алдынгы эшләнмәләр белән кызыксынуын белдерде, чөнки компания бу өлкәдә җитештерү егәрлеген үстерә. Германия компаниясенең РФ нең Идел буе төбәге буенча вәкиле Константин Тютько югары басымлы система өчен заманча торбалар хакында сөйләде. Рөстәм Миңнеханов бу продукциянең республиканың нефть, газ, химия комплексында куллану мөмкинлеген өйрәнергә тәкъдим итте.