Волгоград өлкәсе губернаторы Сергей Боженов ИТ-паркта булды

Бүген Волгоград өлкәсе губернаторы Сергей Боженов республика Премьер-министры Илдар Халиков озатуында ИТ-паркта булды.
Казанга Волгоград өлкәсе делегациясе составында губернатор администрациясе җитәкчесе Максим Решетов, губернатор киңәшчеләре Сергей Захарченко һәм Мөнирә Шабанова, Волгоград өлкәсе матбугат һәм мәгълүмат министры Ольга Дьякова, икътисад, тышкы икътисади элемтәләр һәм инвестицияләр министры Эльвира Лагутина, транспорт һәм юл хуҗалыгы министры Андрей Путин һәм дәүләт милке белән идарә итү министры Марина Леонтьева килде.
Кунакларны ТР мәгълүмат һәм элемтә министры урынбасарлары Анатолий Геллер һәм Әнисә Гайнуллина, “ИТ-парк” технопаркының югары технологияләр буенча директоры Динар Насыйров каршы алды.
Динар Насыйров кунакларга ИТ-парк һәм республикадагы мәктәп эскәмиясеннән ИТ-белгечләр әзерләүче уникаль экосистема турында сөйләде. Шулай ук КФУ базасында ачылган ИТИС Югары мәктәбе турында да белдерде.
ТР мәгълүмат һәм элемтә министры урынбасары Әнисә Гайнуллина кунакларга электрон рәвештә дәүләт хезмәтләре күрсәтү мөмкинлеге турында сөйләде.
Кунакларга Россия өчен уникаль электрон документ әйләнеше системасын тәкъдим иттеләр.
Илдар Халиков үзенең шәхси кабинетыннан системада электрон документ әйләнеше эшен тәкъдим итте. “Хатны карагач, резолюция язам һәм тиешле министрга җибәрәм. Хәзер, проектларны тәкъдим иткәндә, миңа 24 документ килде, аларның 19 ы тиешле резолюцияләр белән тармак министрлыкларына һәм ведомстволарына җибәрелде”, - дип сөйләде Илдар Халиков, дип хәбәр итә ТР Мәгълүмат һәм элемтә министрлыгы матбугат хезмәте.