Елына 1 млн. сумлап керем алучылар олигарх-пенсионер була алмый – Марсель Имамов

Татарстанда пенсионерлар саны геометрик прогрессия буенча арта бара, мәсәлән, 2010 елда 1 млн. 29,9 мең, былтыр 1 млн. 59,5 мең (877,4 меңе картлык буенча пенсия ала, 71,2 меңе – инвалидлык һәм 35,7 меңе – туйдыручысын югалту буенча һәм болар барысы да хезмәт пенсияләре исәпләнә, тагын 75,2 меңе – социаль пенсияләр кебек дәүләтнең пенсия белән тәэмин ителеше буенча) булса, быел 1 млн. 72,2 меңгә җыела, 2015 елда исә 1 млн. 110,3 меңгә җитәр дип фаразлана. Хәзерге вакытта республика буенча пенсиянең уртача күләме 8 мең 733 сум санала.

Бүген ТР Министрлар Кабинетында уздырылган брифингта Россия Пенсия фондының ТР буенча бүлеге идарәчесе Марсель Имамов пенсияләргә кагылышлы мәсьәләләрдә аңлатма биреп, тагын түбәндәгеләрне белдерде.

Татарстанлыларның хезмәт пенсияләрен карап чыгып, хәзер пенсиягә чыгучыларның пенсия күләме, 2002 елда чыгучыларга караганда, кимрәк, һәм бу хәл алга таба да күзәтеләчәк, чөнки бу хезмәт хакы белән турыдан-туры бәйле, диде ул. ТР Икътисад министрлыгы санап күрсәткәнчә, мәсәлән, 2013 елда картлык буенча пенсиягә яңа чыкканнарга уртача 8 мең 518 сум пенсия билгеләнә, ә “элеккегеләр”нең пенсия күләме уртачасы – 10 мең 289 сум һ.б.

Мәҗбүри иминият взнослары тарифлары 2013 елда пенсия иминияте буенча 22 процент, медицина иминияте буенча 5,1 процент тәшкил итә. Мәҗбүри пенсия иминияте системасына иминият взнослары түләттерелә торган хезмәт хакының елына максималь күләме быел 568 мең сум (моңарчы 512 мең сум иде) һәм шуңа 10 процент каралган, соңгысы Пенсия фондының солидар өлешенә (ул Россия ПФның гомуми иминият счетын формалаштыра, аннары акчалары хезмәт пенсиясенең тотрыклы база күләмен түләүгә һ.б. солидар түләмнәргә җибәрелә) китә. Димәк, гражданның кереме 568 мең сумнан артса, арткан сумма аның пенсиясен формалаштыруга катнашмый. Шуңа күрә, елына 1 млн. сумлап керем алучылар киләчәктә олигарх-пенсионер була алмый, ди М.Имамов.

Быел 1 гыйнвардан минималь хезмәт хакы күләме (МРОТ) 5 мең 205 сум дип билгеләнгән. Шул рәвешле, эшмәкәр кебек эш белән үзләре тәэмин итүчеләр өчен мәҗбүри пенсия иминиятенә тариф исәпләгәндә, 5 мең 205 сумны 2гә (ягъни 2 МРОТны) һәм 26 процентка, шуны 12 айга тапкырлап чыгарырга кирәк була: димәк, елына 32 мең 479,2 сум, аена исә 2 мең 706,6 сум чыга. Һәм эшмәкәрләр эшләмәсә дә шуны түләргә тиеш була. Медицина иминияте тарифы 5 мең 205 сумны 5,1 процентка һәм 12 айга тапкырлап исәпләнә һәм елына ул 3 мең 185,5 сум тәшкил итә. Ләкин эш урыннары зарарлы һәм куркыныч булган эш бирүчеләр өчен быел өстәмә тариф кертелә:1 нче исемлек буенча 4 процент, 2 нче исемлек буенча 2 процент. Өстәмә взнослар түлисе килмәсә, эш бирүче ТР Хезмәт, мәшгульлек һәм социаль яклау министрлыгы аша эш урыннарын сертификацияләү процедурасы уздырырга һәм хезмәткәр өчен зарарлы эш урыны булмавын расларга тиеш була, дип белдерде Россия Пенсия фондының ТР буенча бүлеге идарәчесе.