Казанда гомуми кулланыштагы авиация үсеше мәсьәләләре буенча РФ Президенты каршындагы комиссия утырышы булачак

Бүген Татарстанга эшлекле сәфәр белән РФ Президенты каршындагы гомуми кулланыштагы авиация үсеше мәсьәләләре Комиссиясе вәкилләре килде.
Кунакларны “Казан” халыкара аэропортында ТР транспорт һәм юл хуҗалыгы министры Ленар Сафин һәм башка рәсми кунаклар каршы алды.

Бүген “Казан” халыкара аэропортында РФ Президенты каршындагы гомуми кулланыштагы авиация үсеше мәсьәләләре Комиссиясе утырышы уза. Катнашучылар гомуми кулланыштагы авиация өлкәсендә дәүләт сәясәтенең төп юнәлешләрен эшләү һәм гамәлгә ашыру буенча башкарма хакимиятнең федераль органнары һәм РФ субъектлары башкарма хакимиятләре органнарының килешенгән гамәлләрен тәэмин итү турында сөйләшерләр, дип фаразланыла.

Комиссия вәкилләре “Казан” халыкара аэропортының терминалларын һәм башка корылмаларын караячаклар, “Коркачык” укыту-өйрәтү аэродромында булачаклар, анда Татарстанның үзәк аэроклубы эшли.

РФ Президенты каршындагы гомуми кулланыштагы авиация үсеше мәсьәләләре Комиссиясе утырышында ТР Президенты Рөстәм Миңнеханов, “Ачык Хөкүмәт” мәсьәләләре буенча РФ министры Михаил Абызов, Россия Хәрби һава көчләре башкомандующие генерал-лейтенант Виктор Бондарев, РФ Президенты киңәшчесе Игорь Левитин, Росавиация вәкилләре һ.б. катнашыр дип көтелә.


Мәгълүмат өчен:
РФ Президенты каршындагы гомуми кулланыштагы авиация үсеше мәсьәләләре Комиссиясе дәүләт башлыгы тарафыннан 2012 нче елның 13 нче ноябренда расланган Указ нигезендә оешкан.