Рөстәм Миңнеханов”Коркачык” аэродромында булды

Бүген ТР Президенты Рөстәм Миңнеханов Россия Президенты киңәшчесе Игорь Левитин, Россия министры Михаил Абызов, РФ Президенты каршындагы авиация үсеше мәсьәләләре буенча комиссия рәисе Юрий Трутнев, РФ Хәрби-һава көчләре башкомандующие Виктор Бондырев һәм башка кунаклар белән “Коркачык” аэродромында булды. Алар “Казан авиация предприятиесе” ангарын карады, шулай ук “Авиатор” җәйге мәктәп инфраструктурасы белән танышты.

Аэродромда РОСТО-ДОСААФ ТР Үзәк аэроклубы, “Казан авиапредприятиесе” ААҖ һәм “АУЦ Авиатор” урнашкан. “Соңгы 4-5 елда 75 млн. сум акча сарыф иттек, шул исәптә 2 ангарга, аның берсе файдалануга тапшырылды гына әле, - дип сөйләде “Казан авиапредприятиесе” ААҖ генераль директоры Магомед Закаржаев. – Быел ягулык-майлау материаллары склады төзергә ниятлибез, бәясе – 26 млн. сум. Аэроклуб белән уку үзәге өчен ясалма очу-төшү полосасын төзергә ярдәм кирәк.
Хәзерге вакытта предприятие карамагында 20 гә якын самолет һәм вертолет бар, ул Россиядә бердәнбер төрле модификация Bell вертолетлары һәм аның двигательләрен ремонтлау буенча автоматлаштырылган техник үзәк булып тора.
Магомед Закаржаев сүзләренә караганда, аэродромнан кайткач узачак киңәшмәдә 15 кә якын тәкъдим белдерәчәк. Алар авиация эшенә кагылышлы норматив базасына үзгәрешләр кертүгә, федераль һәм җирле матди ярдәм итүгә, шулай ук төбәкләрдә, шул исәптә Татарстанда инфраструктура үсешенә кагыла.
Росавиациянең Татарстан һава транспорты төбәкара территориаль идарәсе җитәкчесе Шәүкәт Умаров кунакларга һәвәскәр пилотлар әзерләү буенча уку үзәге һәм сертификацияләү үзәге хакында сөйләде. Үзәктә һава судносы сатып алган һәм пилот таныклыгы алырга теләүчеләр укый ала. Ул шулай ук аэродромда Robinson, Bell, Ми-2, Ми-8 вертолетларын да кертеп 50 һава судносы бар, дип белдерде.
Быел аэроклуб ачылганга 80 ел. Ел саен Татарстан аны финанслауга 35 млн. сум бүлеп бирә. “Безнең планер спорты буенча җыелма команда Россия дә иң көчлесе санала”, - дип ассызыклады “РОСТО-ДОСААФ ТР Үзәк аэроклубы” автоном коммерцияле булмаган оешма җитәкчесе Радик Халиуллин.