“IT-чемпион” бәйгесенең беренче көннәрендә үк андаТатарстанның 2меңнән артык укучысы катнашты

. “IT-чемпион”ның беренче 5 көндәге нәтиҗәләрен бүген ТР Хөкүмәте йортында узган брифингта ТР Премьер-министры урынбасары-мәгълүматлаштыру һәм элемтә министры Роман Шәйхетдинов җиткерде.
Инде хәбәр ителгәнчә, Татарстанда “IT-чемпион” республикакүләм бәйгесенә 1 мартта старт бирелгән иде.

Мәктәп укучылары арасында уздырылучы бу бәйге ике мөстәкыйль номинациядән тора. Баллар исәпләүгә нигезләнгән “Иң актив укучы” номинациясе өч этапны эченә ала. Беренчесе 1 марттан 24 майга, икенчесе 25 майдан 1 сентябрьгә, өченчесе 2 сентябрьдән 20 декабрьгә кадәр дәвам итә. Мәгариф һәм фән министры урынбасары Андрей Поминов искәртеп узганча, әлеге бәйгедә республиканың барлык муниципаль районнары һәм шәһәр округларыннан 1561 мәктәп катнаша. Беренче көннәрдә бәйгедә катнашучылар саны буенча Казан, Чаллы шәһәрләре, Актаныш, Саба, Балтач, Түбән Кама районнары лидерлыкка чыккан. “Иң актив укучы” номинациясе укучыларның өлкән буын вәкилләрен электрон хезмәтләрдән даими файдаланырга өйрәтүен стимуллаштыра. Ягъни малайлар һәм кызлар өлкәннәрнең ТР Дәүләт һәм муниципаль хезмәтләр порталында (uslugi.tatarstan.ru) шәхси кабинетларын теркәп, аларны теге яки бу хезмәт өчен түләргә өйрәтергә тиеш. Өлкәннәр (баланың туганнары, якыннары, дуслары, күршеләре һ.б.) порталдагы шәхси кабинетларына укучының “ТР да Электрон мәгариф” мәгълүмат системасындагы логинын кертеп, түләүләрне башкарырга тиеш була. Укучыга өлкәннәрнең шәхси кабинетын теркәгән өчен дә, бу кабинет аша кереп башкарылган һәр түләү (газ, торак-коммуналь хезмәтләр,телефон, Интернет һ.б.) өчен дә баллар исәпләнә. Мәсәлән, һәр финанс транзакциясе 4 әр балл белән бәяләнә. Призлар да балларга карап биреләчәк. Аена ким дигәндә 20 балл җыйган балалар аны “IT-чемпион” логотибы төшерелгән магнитка алмаштыра ала. Балларын ай саен сувенирга алмаштырмыйча. квартал азагына кадәр саклап һәм тулыландырып килгән укучылар аны кыйммәтлерәк бүләккә алмаштыра ала. Гомумән алганда, бүген аңлатуларынча бәйгегә һәр районда ай саен да, квартал саен да нәтиҗәләр ясала барачак. Ә төп нәтиҗәләре ел ахырында Казанда игълан ителәчәк. Бүләкләр ассортименты бик киң. Анда магнитлардан алып, флешка-ручкаларга, iPadка кадәр бар. “Приз фонды даими рәвештә тулыланып торачак. Хәзер конкурска банклар да, элемтә операторлары да кушылды”, -ди Мәгълүматлаштыру һәм элемтә министры Роман Шәйхетдинов.
“ТР дәүләт һәм муниципаль хезмәтләр порталы үсеше” номинациясе. беренчесеннән аермалы буларак, укучыларның иҗади активлыгына исәпләнгән. Анда катнашып алар программалаштыру, дизайн өлкәсендә иҗади идеяләрен ача, сервис һәм электрон хезмәтләргә кагылышлы кызыклы идеяләре белән уртаклаша ала. Аерым алганда, аларга электрон хезмәтләр өчен иң яхшы баннер яки логотип, иң яхшы видеоролик, иң яхшы презентация эшләү мөмкинлеге бирелә. Әлеге иҗади конкурс 1 майда башланып иҗади сәләткә нигезләнә. Ул әле 1 майда гына башланачак һәм 3 ноябрьгә кадәр дәвам итәчәк. 4 ноябрьдән 17 ноябрьгә кадәрге аралыкта иң яхшы эшләр сайлап алыначак, йомгак 20 декабрьдә ясалачак.
“IT-чемпион” конкурсында актив катнашучылар өчен IT-паркка экскурсияләр, мәдәни чаралар, очрашулар, танылган шәхесләр катнашында мастер-класслар каралган.