РФ Дәүләт Думасында 2013 елгы Универсиаданы тәкъдир иттеләр

Бүген Россия Федерациясе Дәүләт Думасы стеналарында (Мәскәү) 2013 елгы XXVII Бөтендөнья җәйге Универсиадасына багышланган күргәзмә узды. Экспозиция ачылу тантанасында РФ Федераль Җыелышы Дәүләт Думасы Рәисенең беренче урынбасары Александр Жуков, Татарстан Республикасы Президенты Рөстәм Миңнеханов һәм башка рәсми затлар катнашты. 

Тантананы өч мәртәбә Олимпиада чемпионы, Универсиада илчесе Мария Киселева башлап җибәрде. «Универсиададан соң кала торган мирастан без һәм безнең балалар файдаланачак. Универсиада масштабы гаять зур – 170 илдән 13 меңнән артык катнашучы», – дип ассызыклады спортчы.

 РФ Федераль Җыелышы Дәүләт Думасы Рәисенең беренче урынбасары Александр Жуков әйтүенчә, катнашучылар саны һәм масштабы буенча Универсиада, әлбәттә әһәмияте буенча да Олимпиададан соң икенче урындагы вакыйга. “Ил өчен мондый ярышлар уздыру – зур вакыйга. Алар инфраструктура төзергә, иң яхшы стадионнар, аэропорт, кунакханә төзергә мөмкинлек бирәләр, – дип белдерде РФ Дәүләт Думасы вице-спикеры. – Бүгенге көн тәртибендә иң алдан Сочи тора, әмма сез катнашучылар санын күз алдына китерер өчен әйтәм: Универсиадада алар Олимпиада уеннарына караганда өч мәртәбә артыграк була. Бөтенегезне дә безнең күргәзмәне карарга чакырабыз. Сез монда Универсиаданың студентлар спорты һәм иң югары казанышлар спорты, массалы спорт икәнен аңлыячаксыз». 

Татарстан Президенты Рөстәм Миңнеханов 2013 нче елгы Казанда узачак Универсиаданың бары татар проекты түгеллеген, ә эре федераль проект икәнлеген билгеләп үтте. «40 елдан соң безнең илгә Универсиада кире кайтты. Беренче мәртәбә җәйге Универсиада Мәскәүдә 1973 елда уздырылган, һәм без менә яңадан бу хокукка лаек булдык, – дип ассызыклады Татарстан Президенты. – Ил җитәкчелеге, Россия Хөкүмәте һәм РФ Дәүләт Думасы зур ярдәм күрсәтте. Барыгызга да безгә ярдәм иткәнегез өчен зур рәхмәт». 

 Универсиадага әзерлек эшләре, Рөстәм Миңнеханов сүзләренчә, вакытында төгәлләнәчәк. «Бездә Казан метрополитенының өч станциясе төзелеше тәмамланып килә, март аенда бик зур Су спорт төрләре стадионын эшкә кертәбез, безгә бары стадионны төзеп бетерәсе генә кала, - диде ул. - 6 июльгә бөтен объектлар да әзер булачак, барыгызны да җәйге Универсиада ачылу тантанасына чакырабыз. Казан сезне көтә, Казан сезгә рәхмәтле!» Шулай ук ТР Президенты Россия Спорт министрлыгына һәм ярдәм иткән бөтен федераль министрлыкларга һәм ведомстволарга рәхмәтен белдерде.

Тантанада Дума фракцияләре җитәкчеләре дә чыгыш ясады. ЛДПР фракциясе җитәкчесе Владимир Жириновский сүзләренчә, спорт аралашу төренең иң яхшы формасы, бигрәк тә яшьләр һәм студентлар спорты. «Ышанам ки, бу дөньядагы иң әйбәт Универсиада булачак, – дип белдерде депутат. – Иң мөһиме – күтәренке кәеф булачак. Татарстан һәм Казан кунакларын кайнар сәламлиячәк, бөтенесе бәхетле булыр. Шуңа күрә без 2013 елның 6 июле җиткәнен көтәбез». 

КПРФ фракциясе җитәкчесе Геннадий Зюганов Казанда узачак Универсиада чынлап та уникаль спорт ярышы булачагына ышанганын белдерде. «Иң башта Татарстан җитәкчеләрен котлыйсым килә, - дип әйтте ул. – Мине бу республика белән күптәннән якын дуслык хисе бәйли. Анда һәрвакытта эшли белделәр, бик әйбәт төзи белделәр. Мин Татарстан Президенты да спортчы булуына бик шат, ул автогонкаларны да белә, һәм уен спорт ярышларында да катнаша». Тантанада шулай ук ТР Дәүләт Советы Рәисе Фәрид Мөхәмәтшин, РФ Дәүләт Думасы депутатлары, таныклы спортчылар Владислав Третьяк һәм Марат Сафин, ТР яшьләр эшләре, спорт һәм туристлык министры Рәфис Борһанов һәм башка рәсми затлар катнашты.

 Кунакларга тәкъдир ителгән күргәзмә 6 тематик стендларга бүленгән. Һәр зонада урнаштырылган тачскриннар һәм видеоэкраннарга трансляцияләнә торган презентацияләр, стеналарга урнаштырылган лайтбокслар ярдәмендә информация белән танышып була. Рәсми кунакларны Бөтендөнья студентлар уены костюмнарын кигән “Универсиада йөзе” конкурсында җиңүчеләр һәм «Казань 2013» командасы волонтерлары каршы алды. Тантанада катнашучыларга брендлы сувенир продукция һәм милли ризык – чәк-чәк бүләк ителде. 

Күргәзмә ачылганнан соң «Универсиада» фракцияара депутат берлеге утырышы узды. Анда РФ Дәүләт Думасының Физик культура, яшьләр эшләре һәм спорт буенча комитет әгъзалары катнашты. Утырышта Казандагы Бөтендөнья студентлар уенына әзерлек сораулары каралды.