Минтимер Шәймиев: “Мәдәни мирас объектлары белән идарә итү буенча федераль хокукый акт кирәк”

Бүген Казан Ратушасында Идел буе федераль округы прокуратураларының төбәкара семинары узды. Анда Татарстан Республикасы Президенты Рөстәм Миңнеханов һәм Татарстан Республикасы Дәүләт Киңәшчесе, ТР тарихи һәм мәдәни истәлекләрне яңадан торгызу Республика фондының Попечительләр советы рәисе Минтимер Шәймиев катнашты.

ТР Президенты Рөстәм Миңнеханов үзенең сәламләү чыгышында мәдәни мирасны саклауда прокуратура органнарының ролен билгеләп үтте.
ТР Президенты сүзләренчә, республикада тарихи һәм мәдәни истәлекләрне саклау буенча зур эш башкарылган, ләкин бу юнәлештә әле тагын күп эшләр эшләр башкарырга кирәк. Рөстәм Миңнеханов прокурорларга алга таба да бергә эшләүне тәкъдим итте.

ТР Дәүләт Киңәшчесе Минтимер Шәймиев семинарда катнашучыларга “Татарстанның мәдәни мирасы: борынгы Болгар шәһәре һәм Зөя утрау-шәһәрчеге” комплекслы проектының гамәлгә ашырылу барышы хакында сөйләде.
Минтимер Шәймиев мәдәни мирас объектлары белән идарә итү буенча бердәм федераль норматив-хокукый акт кирәклеген ассызыклады. Аның сүзләренә караганда, хәзерге көнгә кадәр мәдәни мирас объектлары турындагы федераль законны гамәлгә ашыру өчен кирәкле булган 11 норматив-хокукый акт әле һаман да кабул ителмәгән. Моңа нисбәтле төстә һәйкәлләрне саклап калу буенча эшчәнлек, алар саны һәм торышы турында төгәл мәгълүматлардан башка гына алып барыла.
ТР Дәүләт Киңәшчесе билгеләп үткәнчә, мәдәни мирас объектлары реестры да бик акрын формалаша. Тиешенчә нибары 121 объект кына теркәлгән, ягъни гомуми саннан 0,05 проценты гына.
Төрле оешмалар милкендә булган объектлар белән идарә итүдә дә авырлыклар бар, дип саный Минтимер Шәймиев. Аларның кайберләре, яңадан торгызылудан яки үзгәртеп корудан соң туристлар өчен керү мөмкинлеген бөтенләй югалта. Мондый очраклар Татарстанда да бар, ди Минтимер Шәймиев. “Чит илләрдә тарихи һәм мәдәни объектларга йөртү буенча кулай формалар табылган”, - дип өстәде ТР Дәүләт Киңәшчесе.