ТР Хөкүмәте Йортында юл хәрәкәте иминлеге комиссиясе утырышы узды

Бүген ТР Хөкүмәте йортында юл хәрәкәте иминлеген тәэмин итү буенча ТР Хөкүмәте комиссиясе утырышы булды. Аңа ТР Премьер-министры урынбасары Әсгать Сәфәров рәислек итте.

ТР Хөкүмәте вице-премьеры утырышның башында республика юлларының торышы һәм тәэмин ителешен тәнкыйтьләде. Начар мисал буларак кичәге юлдагы очракны искә төшерде.
Автомобиль йөртүче тизлеген хәрәкәт иминлеген тәэмин итмәслек дәрәҗәдә арттырган, һава торышы шартларын исәпкә алмаган, ләкин, тикшерә торгач, юлның да тиешле дәрәҗәдә чистартылмаганлыгы беленде, диде. Вице-премьер комиссиягә җыелганнарга һәм муниципаль берәмлекләргә мөрәҗәгать итеп, күп чакрымлы юлларны тиешенчә карап тотуга килешү төзегәнче, башта компаниянең куәте нинди булуына игътибар бирергә кирәклегенә басым ясап әйтте, ә гаеплеләргә карата иң катгый чаралар күрүне таләп итте, моннан ары андый хәл кабатланмасын, диде.

Әсгать Сәфәров язгы чорда да юлларны-урамнарны карап тору мәсьәләсен күтәрде. Җылы көннәр башлану белән, машина юлында гына түгел, бәлки җәяүлеләр сукмагында да зур күлләвекләр барлыкка килә.

“Кар-яңгыр сулары агу урыннарын үз вакытында чистартып һәм аларның торышын карап торырга кирәк. Мин барлык муниципаль берәмлек башкарма комитеты җитәкчеләрен бу хәлләрне игътибар үзәгендә тотуны сорыйм. Гадәттән тыш хәлләр килеп чыккан очракта, аларны тизрәк хәл итү өчен махсус техника чыгарырга кирәк”,-дип тәмамлады Әсгать Сәфәров.