Татарстан өчен, Ислам хезмәттәшлеге оешмасы составына керүче илләрдә сату базарын киңәйтү бик актуаль – Линар Якупов

ТР Президенты Рөстәм Миңнеханов җитәкчелегендәге Татарстан Республикасы делегациясенең Согуд Гарәбстанына сәфәре нәтиҗәләре турында бүген ТР Министрлар Кабинетында узган брифингта сүз барды.

ТР Инвестицион үсеш агентлыгы җитәкчесе Линар Якупов билгеләп үткәнчә, визит кысаларында рәсми затлар, Җиддә шәһәрендә узган икътисади форумда катнашкан. Форумның ачылыш өлешендә үк Согуд Гарәбстаны Президенты чыгыш ясагач, Рөстәм Миңнеханов, алардагы шәһәр, инфраструктура төзелеше, торак-коммуналь хуҗалык өлкәсендәге проблемаларның безнеке белән бик охшаш булуына игътибарны юнәлткән. ТР Президенты чыгышында билгеләп үткәнчә, төзелеш-инвестиция өлкәсендәге үсеш, Татарстанга яңа офыкларны үзләштерү юлына чыгарга мөмкинлек биргән: шул рәвешле, республикада үсеп килүче буынның торакка ихтыяҗын канәгатьләндерү, кирәкле социаль учреждениеләр, үсеш алган транспорт инфраструктурасы белән тәэмин итүгә юл ачылган.

Җиддә шәһәрендә Татарстан Президенты Ислам хезмәттәшлеге оешмасы генераль секретаре Әкъмалетдин Ихсаноглы белән очрашкан. Сөйләшү барышында, республиканың Ислам хезмәттәшлеге оешмасы бүлекчәләре белән актив хезмәттәшлек итүе һәм киләчәктә дә ике як өчен дә отышлы булган мөнәсәбәтләр үсешенә исәп тотылу билгеләп үтелгән.

Ислам үсеш банкы төркеме президенты Әхмәд Мөхәммәд Али әл Мәдәни белән очрашу барышында, яклар хезмәттәшлек перспективалары турында әңгәмә корган. Линар Якупов искәртеп узганча, безне, Ислам үсеш банкы төркеме белән, ике як тарафыннан имзаланган меморандум берләштерә. Меморандум нәтиҗәсе буларак, 2012 нче елда Татарстан халыкара инвестиция компаниясе барлыкка килүен әйтеп узу урынлы булыр. Әхмәд Мөхәммәд Али әл Мәдәни, Татарстанның авыл хуҗалыгы тармагы, илгә азык-төлек импортын кертү ягында булган Согуд Гарәбстаны бизнесменнары өчен, инвестицияләү мәсьәләсендә кызыклы була алуын билгеләп узган.

Линар Якупов сүзләренә караганда, форум кысаларында, Россия Федерациясе һәм Ислам хезмәттәшлеге оешмасы илләренең икътисади хезмәттәшлегенә багышланган V Халыкара саммит – KAZANSUMMIT-2013 та катнашу мәсьәләләре дә күтәрелгән. Универсиада белән бәйле рәвештә, быел аны үткәрү 2-3 октябрьгә планлаштырыла. “Хәзердән үк Ислам хезмәттәшлеге оешмасының икътисади блогы белән берлектә эш алып барыла. Аларның да, Ислам үсеш банкы вәкилләренең дә KAZANSUMMIT та катнашачагы мәгълүм, һәм бу бик сөенечле күренеш”, - дип белдерде Линар Якупов. Әкъмалетдин Ихсаноглы бу чарага кулыннан килгәнчә ярдәм итәргә вәгъдә биргән.

Инвестицион үсеш агентлыгы җитәкчесе азык-төлек куркынычсызлыгы белән бәйле мәсьәләгә дә тукталды. “Бүген залив илләренең Татарстанның продукт линейкасына, аеруча авыл хуҗалыгы продукциясенә соравы арта. Ислам хезмәттәшлеге оешмасы һәм Ислам үсеш банкы вәкилләре, безнең товарны Якын Көнчыгыш һәм Африка илләре базарына экспортка чыгаруда кызыксынган булуы турында җиткерде. Продукциясенең 50 процент өлешен экспортка чыгаручы Татарстан өчен, Ислам хезмәттәшлеге оешмасы составына керүче илләрдә сату базарын киңәйтү бик актуаль. Инвестицион үсеш агентлыгы алдында, әлеге юнәлештә сату челтәрен киңәйтү, мөмкин кадәр инвестицияләр җәлеп итү бурычы тора”, - дип билгеләп узды Линар Якупов. “Без продукт линейкасын алар таләпләренә җавап бирерлек итеп төзергә тырышабыз. Якын киләчәктә нәтиҗәләрен татырбыз”, - дигән ышанычын ирештерде ул.

Л. Якупов шулай ук “СМАРТ-Сити Казан” проектына тукталып, Рөстәм Миңнехановның бу проектны республиканың визит карточкасы дәрәҗәсендә бәяләвен әйтте.

Татарстан делегациясе шулай ук Мәккә провинциясе әмире Халид Фейсал әл Сауд белән очрашкан. Визит барышында рәсми затларның Мәккәгә барып, Кече хаҗ – гомрә кылуын да искәртеп үтәбез. Гомрә ул – Мәккәгә хаҗ кылу өчен бер айга бару түгел, ә елның теләсә кайсы вакытында бару. Татарстан делегациясе әгъзалары дөньяда иң эре мәчетләрнең берсе Әль-Харамда да булган.

Татарстан делегациясе составында Согуд Гарәбстанына шулай ук Казан мэры Илсур Метшин, ТР Президентының халыкара мәсьәләләр буенча ярдәмчесе Радик Гыйматдинов, ТР Сәүдә-сәнәгать палатасы рәисе Шамил Агеев, “Ак Барс Банк” идарәсе рәисе Роберт Мингалиев барган.