Татарстан Президенты Татарстан Республикасының Саба районында өстәл теннисы турнирында булды

Бүген Татарстан Республикасы Президенты Рөстәм Миңнеханов РСФСРның атказанган урманчысы Нургали Миңнеханов истәлегенә багышланган өстәл теннисы буенча Татарстан Республикасы Саба районындагы мемориалда булды. Турнирда шулай ук РФ Президенты киңәшчесе, Россия Өстәл теннисы федерациясенең попечительләр советы рәисе Игорь Левитин, Татарстан Республикасы Саба районы башлыгы Рәис Миңнеханов та булдылар.

Өстәл теннисы буенча традицион турнир Лесхоз поселогының универсаль спорт комплексында 12 нче мәртәбә уздырыла. Турнир кысаларында ярышлар 22 марттан алып 24 мартка кадәр Татарстан Республикасының авыл районнарыннан килгән 18 яшькә кадәрге яшүсмерләр һәм кызлар, 21 яшькә кадәрге яшүсмерләр һәм кызлар, шулай ук ирләр һәм хатын-кызлар арасында “Иң көчлеләр турниры” узачак. Ярышларда Татарстан Республикасының 26 районынан, Россиянең 17 шәһәреннән спортчылар катнашачак. Шулай ук ярышларда Польшадан ике теннисистка һәм Кытайдан бер теннисист та булачак. Катнашучылар арасында Россиянең 2013 елгы яңа чемпионнары, илнең җыелма командасы әгъзалары да бар.

Ярышларда катнашучыларны сәламләп, Татарстан Республикасы Президенты Рөстәм Миңнеханов аларга спорт ярышларында уңышлар теләде. "Мин ышанам ки, сезнең арадан Казанда узачак Универсиадада катнашучылар һәм илебез өчен медальләр яулаучылар булыр", - дип белдерде Татарстан Республикасы Президенты.

Игорь Левитин үз чиратында билгеләп үткәнчә, әлеге турнир Казанда булачак зур спорт чарасы алдыннан уза. Россия Өстәл теннисы федерациясенең попечительләр советы рәисе әйтүенчә, Саба районындагы турнирны халыкара турнир итү күз алдында тотыла. Игорь Левитин районда халыкара дәрәҗәгә лаек булырлык яңа өстәл теннисы сарае пәйда булыр дип ышаныч белдерде.

Рөстәм Миңнеханов һәм Игорь Левитин спортчыларны Россия спорт остасы исеме бирелү белән котладылар. Игорь Левитин шулай ук Татарстан Республикасы Президентына өстәл теннисы өчен ракеткалар һәм шарчыклар бүләк итте, аны шушы спорт төре белән шөгыльләнергә өндәде.