Татарстанда санитар чистарту буенча ике айлык 15 апрельдә башлана

ТР Министрлар Кабинеты күрсәтмәсе белән, Татарстан Республикасы территориясендә 15 апрельдән 15 июньгә кадәр язгы санитар-экологик чистарту буенча ике айлык уздырыла. Элек бу эшләр 1 апрельдән башланса, быел һаман да кар калын һәм һава торышы катлаулы булу сәбәпле, шулай ук XXVII Универсиадага якынрак китерү йөзеннән, ул 15 көнгә чигерелә.Бүген ТР Хөкүмәте йортында, республика муниципаль берәмлекләре белән берлектә видеоконференция режимында, уздырылган брифингта ТР экология һәм табигать ресурслары министры Артем Сидров шулай дип игълан итте.

Гомумреспублика өмәсе исә 20 апрельгә билгеләнгән, Казанга игътибар аеруча зур булачак, бигрәк тә Универсиада спорт объектлары тирәсе территорияләренә, диде ул.

Брифингта катнашкан Казан каласы Башкарма комитетының тышкы уңайлыклар булдыру комитеты рәисе Игорь Куляжев Казанда да территорияләрне чистарту буенча гомумшәһәр өмә 20 апрельга билгеләнгән, дип искәртте. Гомуммәгълүм ике айлык, Башкарма комитет күрсәтмәсе нигезендә, 1 апрельдан башлана, бу башкалада кар тизрәк эреп бетәр һәм эшләрне тизрәк башлап, алданрак очлап чыгу ниятеннән шулай, ләкин эш бетми икән, димәк, санитар-экологик чистарту эшләре 15 июньгә кадәр озайтылырга мөмкин, диде. Нәтиҗәдә, казанлылар өчен ике айлык, сүлпән эшләгән очракта, ике ай ярымлыкка әйләнү ихтималы бар.

А.Сидоров сүзләренчә, былтыргы тәҗрибәгә таянып, быел да тиешсез урыннарда чүплекләр хасил булу урыннарын ачыклау һәм бетерү эшенә ирекле ярдәмчеләр, экологик оешмалар, яшьләрнең экологик хәрәкәтендәгеләрне җәлеп итү күздә тотыла. Шулай ук геомәгълүмати системалар, беренче чиратта, теләгән һәркемгә үзен җәмәгать инспекторы ролендә тоярга этәргеч биргән “Народный контроль” сервисы киң файдаланылачак.

ТР Экология һәм табигать ресурслары министрлыгы исә көчәйтелгән эш режимына күчә, министрлыкның экологик мәсьәләләр буенча территориаль органнары составында булган 130 инспекторның 90 проценты шушы ике ай дәвамында төп эшкә җәлеп ителәчәк, дип вәгъдәләде министр. Былтыр, мәсәлән, ике айлык барышында табигатьне саклау законнарын бозуның 11 мең очрагы беленде, гаеплелеәргә карата 15 млн. сумлык штраф салынды; тиешсез урында хасил булган 1048 чүплекнең 601е юк ителде. Чүплекләр хасил булуы хакында “Народный контроль” сервисы аша халыктан җәен һәм көзен 326 заявка алынды һәм 286 чүплек бетерелде, диде.

15 апрельдән 15 июньгә кадәр арада республиканың Казан каласы, Лаеш, Яшел Үзән, Биектау муниципаль районнары чикләрендәге Горький тимер юлы яны, Тукай, Түбән Кама, Зәй, Әлмәт, Бөгелмә районнары чикләрендәге Куйбышев тимер юлы яны территорияләрен, Питрәч, Балык Бистәсе, Мамадыш, Алабуга, Тукай районнары чикләреннән узган М7 федераль трассасы һәм аның тирә-ягын чистарту, Казан шәһәренең санитар-экологик торышын күзәтчелек итүне көчәйтү төп эш юнәлешләре буларак билгеләнгән. Үләт базларын карап тоту мәсьәләсендә дә контрольны көчәйтү планлаштырыла. Казанда исә сквер, парк ише агачлык-куаклыклар, балалар мәйданчыклары, бөтен төр базарлар, халык күпләп килеп ял итә торган урыннар, ял итү базалары, гараж кооперативлары, бакчачылык ширкәтләре, торак сектор биләмәләре, тимер юлга китерә торган юллар, аэропорт, елга порты территорияләре торышы җитди контрольга алыначак. Рөхсәт ителмәгән һәм таләпләр буенча җиһазландырылмаган урыннарда сәүдә итүчеләрне җавапка тарту ниятләнә, дип кисәтеп куйды ТР экология һәм табигать ресурслары министры А.Сидоров.