Казанда дүртенче тапкыр “Чиста су.Казан” күргәзмәсе һәм конгрессы эшли башлады

Бүген Татарстан Республикасы башкаласында дүртенче тапкыр “Чиста су. Казан” дигән махсуслаштырылган күргәзмә һәм шул ук исемдәге конгресс эшли башлады. Быелгы конгресс һәм күргәзмә Россиядә Әйләнә-тирә мохитне саклау елының төп чаралар планында да урын алуы белән дә әһәмиятле. Аның ачылыш тантанасы ТР Премьер-министры Илдар Халиков, Су ресурслары буенча федераль агентлык җитәкчесе урынбасары Вадим Никаноров, ТР экология һәм табигый байлыклар министры Артем Сидоров һ.б. катнашында узды.

Әлеге традицион чаралар су ресурсларыннан экономияле файдалану, коммуналь һәм сәнәгать тармакларын су белән тәэмин итү, эчә торган суның сыйфаты турында фикерләшү мәйданы булып хезмәт итә. Илдар Халиков күргәзмә ачылышында биредә демонстрцияләнелә торган тәкъдимнәр, идеяләрнең республиканың эре предприятие-оешмалары тарафыннан гамәлгә ашырылуын ассызыклады. “Бүгенге күргәзмә һәм конгресс яңа технолоргияләр тәкъдим ителү урыны гына түгел, республика халкын, су белән тәэмин итү буенча җаваплы предприятиеләрне борчый торган актуаль мәсьәләләр хакында фикерләшү урыны да”, - дип ассызыклады ул.

Ул шулай ук эчә торган суның торышын мониторинглауның әһәмиятенә тукталды, ил күләмендә, шул исәптән Татарстанда да “Чиста су” максатчан программаларының гамәлгә ашырылуын искәртте. Республикада ел саен 100 әр торак пунктка суүткәргеч системалар сузылуын сөйләде. Илдар Халиков конгресста катнашучыларның игътибарын кече торак пунктларны су чистарту системалары белән тәэмин итү мәсьәләсенә юнәлтте. “Бу тема күргәзмә экспозицияләре белән танышканда да күтәрелде. Эре гидротехник чистарту корылмалары төзү ил күләмендәге актуаль мәсьәлә. Тик әлеге юнәлеш күргәзмәдә җитәрлек чагылыш тапмаган”, -дип саный ул. Хөкүмәт рәисе күргәзмәне оештыручыларга, аерым алганда, ТР Экология һәм табигый байлыклар министрлыгына, шундый проектларны барлап, киләсе күргәзмәдә тәкъдим итәргә кушты.

Илдар Халиков җылылык, су белән тәэмин итү челтәрләрендә инвестиция программаларын вакытында һәм анык үтәү кирәклегенә тагын бер кат басым ясады.

Иртәгә конгресс эше “түгәрәк өстәл”ләрдә дәвам итәчәк. Хәзерге минутларда Илдар Халиков катнашында конгрессның пленар утырышы бара. Утырышның темасы – Россиянең су тармагын үстерү.