Татарстанның барлык муниципаль берәмлекләрендә дә, халыкның игътибарын җәлеп итү өчен, җирле игълан системалары сыналачак

РФ Президентының Идел буе федераль округындагы вәкаләтле вәкиленең Региональ үзәкләштереп игълан салу автоматлаштырылган системасын (РАСЦО) эшләтеп карау, нәтиҗәлелеген бәяләү буенча йөкләмәсен үтәү йөзеннән әзерләнгән Татарстанда гражданнар оборонасы җитәкчесе - ТР Премьер-министры әмере белән, 9 апрель көндез сәгать 10нан 12гә кадәр арада Татарстанның барлык муниципаль берәмлекләрендә дә, халыкның игътибарын җәлеп итү өчен, җирле игълан системаларын сынау ниятләнә.

Шул рәвешле, торак пунктлардагы электросиреналар, Казандагы ОКСИОН, метрополитендагы СЗИОНТ терминал комплекслары, муниципаль берәмлекләрдәге икътисадның аеруча хәтәр саналган 16 объектында сөрән салу буенча локаль системалар эшләтеп карала. Республикада пилот проект булган Cell Broandcast системасын - кәрәзле элемтә операторларыннан “Мегафон” аша абонентларга SMS-игълан җибәрелә, шулай ук Россия Гадәттән тыш хәлләр министрлыгының ТР буенча Баш идарәсе карамагындагы Кризислы вазгыятьләрдә идарә үзәге (ЦУКС) өлкән оператив дежурные тарафыннан телетапшырулар кулга төшерелә, ягъни аларны бүлеп, махсус игълан ясала.

Бүген ТР Министрлар Кабинетында республиканың үзәк мәълүмат чаралары журналистларын җыеп, Россия Гадәттән тыш хәлләр министрлыгының ТР буенча Баш идарәсе җитәкчесе урынбасары Юрий Венедиктов шулай дип белдерде. Аның сүзләренчә, сиренаны ишетү белән, ә аның тавышы игълан ителгән сәгатьләрдә 3-5 минут дәвамында яңгырый, паникага бирелергә, кая да булса йөгерергә, бомбоубежищега, башка качу урыны эзләп чабарга түгел. Сиренаның “Внимание, всем!” дип аталган сигналы фәкать халыкның игътибарын җәлеп итәр өчен генә хезмәт итә, аны ишетү белән, радио һәм телевизорны кабызып, игъланны тыңларга һәм анда кушылганны эшләргә кирәк була, ди ул.

Соңыннан “Татар-информ” журналистының, ул-бу була калса, гражданнар кая барып яшеренәсен, бомбоубежищеларның кайдалыгын беләме, гомумән, бу мәсьәләдә халык арасында аңлату эшләре алып барыламы, дип кызыксынуына, Ю.Венедиктов, бомбоубежищеларның кайдалыгын һәм күпмелеген әйтә алмыйм – бу ябык мәгълүмат, хәер, 6 апрельдәге чара бит өйрәнү максатларыннан гына уздырыла, дию белән чикләнде.

Шул рәвешле, мондый республикакүләм тикшерү барышында Кризислы вазгыятьләрдә идарә үзәгендә оператив штаб эшләячәк, махсус телефоннар гамәлдә булачак: “кайнар линия” (843) 227-45-63, “ышаныч телефоны” 292-64-09, оператив штаб тел. 227-46-09. “Игълан системасын тикшерү барышында туган сораулар буенча татарстанлылар шушы телефон номерлары буенча элемтәгә керсен иде. Файдалы тәкъдимнәр республика территориясендә игълан итү системасын реконструкцияләгән чакта исәпкә алыначак”, - дип халыкка мөрәҗәгать итте Ю.Венедиктов.