Илдар Халиков Татарстанлыларны Бөтендөнья авиация һәм космонавтика көне белән котлады

Бөтендөнья авиация һәм космонавтика көне бүген, 12нче апрельдә билгеләп үтелә. 1961 нче елның 12 нче апрелендә Советлар Союзы гражданины өлкән лейтенант Юрий Гагарин “Восток” космик кораблендә дөньяда беренче тапкыр Җир орбитасы буйлап әйләнде, галәмгә очулар чорын ачты.

Моңа бәйле рәвештә, Татарстан Республикасы Премьер-министры Илдар Халиков Татарстанлыларны котлады.

“Кадерле дуслар! Татарстан Республикасы Хөкүмәте исеменнән һәм шәхсән үз исемемнән сезне Космонавтика көне белән котлыйм!
Беренче тапкыр кешенең - безнең ил гражданины Юрий Алексеевич Гагаринның космоска очкан вакыттагы 108 минуты ХХ гасырның, цивилизация тарихының иң күренекле вакыйгаларының берсе булды. Хәзер космос кешеләр өчен ирешә алмаслык түгел. 500дән артык кеше орбитага очты.1961 нче елдан планета космонавтлары Җирдән читтә 10 меңнән артык көн булган. Беренчеләр арасында Россия вәкилләре дә бар.
Кеше акылының әлеге казанышы конструкторларның, галимнәрнең, космонавтларның, ракета-космос тармагының барлык хезмәткәрләре сәләте, зур хезмәте һәм батырлыгы ярдәмендә тормышка ашты.
Тарих үсешен алдан билгеләгән күп кенә ачышлар Татарстан җирендә булуын билгеләп үтү аеруча күңелле. Казан лабораторияләрендә космик эшчәнлек нигезе булган газ динамикасы, җылылык физикасы, ракета техникасы, галәм киңлеген өйрәнү буенча җитди фәнни тикшеренүләр уздырылган. Республикадп Казанда төрле елларда эшләгән һәм космонавтиканың фәнни һәм гамәли проблемаларын чишүгә зур өлеш керткән Сергей Павлович Королев, Валентин Петрович Глушко һ.м башка бик күп галимнәрне хәтердә саклыйлар.
Казан техник вузлары чыгарылыш студентларының беренче һәм аннан соңгы иярченнәрне әзерләүдә һәм җибәрүдә, идарә итә торган очуларны тормышка ашыруда катнашуы аеруча горурлык тудыра.
“Восток” ракеталарында һәм корабльләрендә Татарстанның алдынгы предприятиеләрендә җитештерелгән приборлар һәм фәнни аппаратура кулланылуы безнең өчен бик күңелле. Хәзер дә республика предприятиеләре космик тармак белән тыгыз хезмәттәшлек итә. Аларның продукциясе планетаара станцияләрдәге ракеталарда киң кулланыла.
Татарстан Республикасы Россиядә беренчеләрдән булып, “Глобаль навигацияле иярчен системасы” Федераль космик программасы һәм Федераль максатчан программасы кысаларында космик технологияләрне куллана башлады. Автомобиль юлларында зыян күргәннәрне коткару хезмәте эшенең оперативлыгын арттыру, урман хуҗалыгында һәм аграр секторда, елгалар акваториясендә һәм зур сәнәгать районнарында әйләнә-тирә мохитне контрольдә тотуны яхшырту әлеге эшчәнлекнең нәтиҗәсе булды.
Татарстанның алга таба да фән, мәгариф һәм технологияләр үсеше дәрәҗәсен, киләчәктә дә илебезгә космосны яулап алуда алдынгылар рәтендә булырга мөмкинлек бирә торган югары фән һәм технология потенциалын саклаячагына шикләнмим”.