ТР Премьер-министры WorldSkills Russia-2013 чемпионаты җиңүчеләре белән очрашты

Бүген Татарстан Премьер-министры Илдар Халиков ТР җыелма командасы әгъзалары - I Бөтенроссия WorldSkills Russia чемпионаты җиңүчеләре белән очрашты. Бу чарада ТР хезмәт, мәшгульлек һәм социаль яклау министры Айрат Шәфигуллин һәм конкурста катнашучыларның укытучылары да бар иде.
ТР Премьер-министры чемпионат җиңүчеләрен Татарстан Президенты, ТР Дәүләт Советы, республика Хөкүмәте исеменнән сәламләде һәм ярышларның гади булмаячагы, көндәшләр җитди булачагы алдан билгеле иде, чөнки 40 тан артык төбәктән 300 дән артык кеше катнашты дип билгеләп үтте.
“Сезнең җиңү – Татарстан, сезнең укытучыларыгыз горурлыгы һәм сезнең күпсанлы яшьтәшләрегезгә үз һөнәрләре буенча иң яхшысы булуга, эре компанияләргә һәм предприятиеләргә уку йортларына күбрәк игътибар бирү өчен этәргеч булып тора”, - дип белдерде Илдар Халиков. Аның сүзләренә караганда, эшче һөнәрләрнең дәрәҗәсен бары тик эре предприятиеләр белән бергә генә күтәрергә мөмкин. “Соңгы елларда алар бу мәсьәләгә аңлап карый”, дип билгеләп үтте И.Халиков.
Татарстан Премьер-министры шулай ук чемпионатта җиңүчеләргә һәм укытучыларга рәхмәт белдерде һәм ТР Президенты боерыгы буенча эшкә өйрәткән һәр остага, укытучыга ел дәвамында айлык премия билгеләү карары кабул ителде, диде.
ТР хезмәт, мәшгульлек һәм социаль яклау министры Айрат Шәфигуллин фикеренә караганда, Татарстан яшьләре үзара гына түгел, ә Россия һәм дөнья күләмендә көндәшлек итәргә тиеш.
Очрашуда спорт мәйданчыклары белән тәэмин ителү мәсьәләсе кузгатылды. ТР Премьер-министры күптән түгел Татартсан Президентының спорт мәйданчыкларына кагылышлы комплекслы программа формалаштыру турындагы карары турында белдерде. И.Халиков сүзләренә караганда, быел республикада 100 гә якын шундый мәйданчык төзеләчәк. “Училищеларга килгәндә, 100 мәйданчыкның ничәсен алар өчен төзергә икәнлеге буенча фикер алышыйк”, - диде ТР Премьер-министры.
Шулай ук тулай торак мәсьәләсе турында да сүз барды. “Бу мәсьәләләрне грант формасында хәл итик”, дип тәкъдим итте И.Халиков. Аның сүзләренә караганда, грантлар эш белән тәэмин итүчеләр ихтыяҗына юнәлдерелгән булырга тиеш.
Очрашу ахырында Татарстан Премьер-министры Илдар Халиков I Бөтенроссия WorldSkills Russia чемпионаты җиңүчеләренә ТР Министрлар Кабинеты Рәхмәт хатларын тапшырды.