Татарстанга урман хуҗалыгын алып бару мәсьәләләрендә Финляндия тәҗрибәсе кызыклы

Татарстанга урман хуҗалыгын алып бару, агачтан биоягулык җитештерү, кадрлар әзерләү мәсьәләләрендә Финляндия тәҗрибәсе кызыклы. Бу хакта бүген Финляндия Республикасы Авыл һәм урман хуҗалыгы министрлыгының Урман хуҗалыгы департаменты генераль директоры Юхо Ояла җитәкчелегендәге Финляндия Республикасы делегациясе белән очрашуда ТР Премьер-министры Илдар Халиков белдерде.

Очрашу башында ТР Хөкүмәте башлыгы делегацияне кунакчыл Татарстан җирендә сәламләде һәм, республикага сәфәрләре өчен, рәхмәтен белдерде. Илдар Халиков ассызыклаганча, соңгы елларда Татарстан һәм Финляндия арасында хезмәттәшлек яхшы темплар белән бара: югары дәрәҗәдә сәяси очрашулар була, зур инвестицион проектлар тормышка ашырыла.

“Сезнең безнең республикага сәфәрегез бик әһәмиятле”, - диде Илдар Халиков кунакларга мөрәҗәгать итеп. Ул Татарстанда урман хуҗалыгы өлкәсендә бик күп эш башкарылуын билгеләп үтте. Республика урманнан тотрыклы файдалануга һәм урман хуҗалыгына яңа илебез һәм чит ил технологияләрен кертүгә аерым игътибар бирә. Аерым алып, Премьер-министр ассызыклаганча, Саба районының Лесхоз бистәсендә, урман производствосын югары сыйфатлы орлык һәм утырту материалын куллануга күчерү өчен, Европада иң зур үзәкләрнең берсе - ТР урман селекция-орлыкчылык үзәге - сафка бастырылган. Анда 12 млн. үсенте үстерелә. Аның сүзләренчә, комплексны заманча җиһаз белән тәэмин итү өчен дә, бик күп эш башкарылган.

Шул ук вакытта ТР урман хуҗалыгының фин коллегалары белән хезмәттәшлек итү потенциалы бар. “Безгә урман хуҗалыгын алып бару, агачтан биоягулык җитештерү мәсьәләләрендә Финляндия тәҗрибәсе бик кызыклы”, - дип белдерде И.Халиков. Моннан тыш, әлеге тармак өчен кадрлар әзерләү мәсьәләсендә дә Финляндия Республикасы тәҗрибәсе кыйммәтле.

“Без хезмәттәшлегебез ике як өчен дә файдалы булыр, дип өметләнәбез”, - диде ТР Хөкүмәте башлыгы.

ТР Урман хуҗалыгы министрлыгының Финляндия Республикасы белән хезмәттәшлеге турында тулырак итеп республиканың урман хуҗалыгы министры Наил Мәһдиев сөйләде, ул билгеләп үткәнчә, Россия һәм Финляндия урман комплекслары ун еллар дәвамында икътисадның урман секторы үсеше һәм аның нәтиҗәлелеген арттыру белән бәйле мәсьәләләрдә тыгыз хезмәттәшлек итә. Үткән елның ноябрь аенда ТР Урман хуҗалыгы министрлыгы учреждениеләре хезмәткәрләре Финляндиянең алдынгы фәнни үзәкләрендә һәм университетларында стажировка үтте.

Финляндия Республикасы Авыл һәм урман хуҗалыгы министрлыгының Урман хуҗалыгы департаменты генераль директоры Юхо Ояла, җылы кабул итүләре һәм республикага сәфәр вакытында кызыклы программа өчен, делегация исеменнән ТР җитәкчелегенә рәхмәтен белдерде.

Юха Ояла билгеләвенчә, хезмәттәшлек мәсьәләләрендә яклар бик тиз арада уртак телгә килгәннәр. Тулаем алганда, ул сөйләшенә торган мәсьәләләрдә тәҗрибә белән уртаклашуны мөһим дип саный. “Бездә бер-беребездән өйрәнерлек нәрсәләр бар”, - диде кунак.

Ю.Ояла фин белгечләренең киләчәктә Татарстанда урман хуҗалыгын ничек үстерергә кирәклеге турында тәҗрибә белән уртаклашырга әзер булуын ассызыклады.

Шулай ук Финляндия Республикасы Авыл һәм урман хуҗалыгы министрлыгының Урман хуҗалыгы департаменты генераль директоры искәртүенчә, Финляндиядә татар диаспорасы бар. “Татарлар – яңа элемтәләр эзли торган бик актив халык”, - диде ул.

Ике яктан да катнашучылар хезмәттәшлек нәтиҗәсендә урман хуҗалыгы үсеше өлкәсендәге фундаменталь һәм практик мәсьәләләрне чишүдә уңышларга ирешелер, дип өметләрен белдерделәр.

Билгеләп үтик, очрашу барышында Илдар Халиков ТР, республика территориясендә тормышка ашырыла торган проектлар турында сөйләде. Ул электрон документ әйләнеше үсеше мәсьәләләренә аерым игътибар бирде һәм кунакларны ИТ-паркка чакырды.