Казанның бер генә пляжы да су коену сезонын ачуга рөхсәт алмады

Казанның бер генә пляжы да төрле сәбәпләр аркасында су коену сезонын ачуга рөхсәт алмады. Бүген Татарстан Министрлар Кабинетында узган брифингта шул хакта хәбәр ителде.

Роспотребнадзор хезмәтенең ТР буенча идарәсе җитәкчесе Марина Патяшина хәбәр иткәнчә, 29 нчы майда Казан пляжларының су коену сезонына әзерлеген тикшерү буенча комиссия эше нәтиҗәләре, әлегә бер ял урынының да су керү өчен тулы дәрәҗәдә әзер булмавын күрсәткән. “Төп сәбәпләр, су объектларын су коену максатларында куллануга санитар-эпидемиологик йомгаклар булмавына, ял зоналарында туфрак һәм сулыклардагы су сыйфаты таләпләргә җавап бирүен ачыклауга ике тапкыр үткәрелгән лаборатор тикшеренү нәтиҗәләре булмавына бәйле”, - дип ассызыклады Марина Патяшина.

Аның сүзләренә караганда, идарә су коену сезоны башында гына түгел, бу чорның буеннан буена, халык туплана торган урыннарда су сыйфатын даими тикшерү белән мәшгуль. Гадәттә Татарстан халкы су буенда 200 ләп урынны ял итү һәм коену өчен куллана. Ел саен сулыклардагы су сыйфатын тикшерү өчен 3 меңгә якын проба алына.

Аның әйтүенчә, хәзерге вакытта ял итү урыннарында суны микробиологик күрсәткечләре буенча мониторинглау башланган. 2013 нче елның маенда үткәрелгән лаборатор тикшерү нәтиҗәләреннән күренгәнчә, сулыклардан алынган пробаларның 26 проценты санитар-химик күрсәткечләре буенча гигиена таләпләренә җавап бирмәсә, 16,4 процентының микробиологик күрсәткечләр буенча нормадан ерак булуы ачыкланган.

Журналистлар белән очрашуны тәмамлап, ТР гражданнар оборонасы эшләре һәм гадәттән тыш хәлләр министры урынбасары Николай Суржко хәбәр иткәнчә, Казансу, Урта, Түбән һәм Югары Кабан акваторияләрендә, Елга порты районының Идел акваториясендә кече суднолар хәрәкәтен чикләү турында ТР Министрлар Кабинеты тарафыннан карар кабул ителде. Бу Универсиада вакытында иминлекне тәэмин итү кысаларында эшләнә.