Универсиада-2013 ачылышы тантанасына репетиция ясау көнендә кайбер урамнарда хәрәкәт вакытлыча чикләнеләчәк

Универсиада өйрәнүләре һәм Уеннар барган вакытта Казанда аерым сәгатьләрдә өлешчә транспорт хәрәкәте чикләнәчәк. Бу хакта ТР Министрлар Кабинетында узган брифингта Эчке эшләр министрлыгының ТР буенча полиция башлыгы урынбасары Фәргать Мөхәммәтҗанов сөйләде.

Искә төшерәбез, Казанда “Универсиаданың 4 көне” исемендә өйрәнүләр башланды. Беренче өйрәнүләр 8 июньдә узды, анда программа буенча 12 июльнең уен көне каралды.

22 нче июнь – Уеннар ачылышы тантанасына репетиция ясау көнендә, спортчыларны Универсиада авылыннан “Казан-Арена” стадионына китергәндә һәм кире илтеп куйганда, кичке якта Мәүлетов, Парин, Җиңү Проспекты, Ямашев урамнары буенча хәрәкәтнең вакытлыча чикләнелүе көтелә.

Ф. Мөхәммәтҗанов сүзләренчә, 4 нче июльдә Универсиаданың генераль репетициясе үткәреләчәк. Бу көнне һәм 6 нчы июльдә – Уеннарның ачылыш тантанасы көнендә дә, шулай ук 17 нче июль – Универсиаданы ябу тантанасы көнендә дә югарыда телгә алынган участокларда хәрәкәт вакытлыча чикләнәчәк.

8-9 нчы июль көннәрендә Үзәк стадион артындагы полумарафон барышында – Казансу яры урамы буенча, ә 12 нче июль көнне оештырылачак марафон барышында Казансу яры, Несмелов, Краснококшайская урамнары буенча юлларны ябу турында актлар әзерләнә, диде Ф. Мөхәммәтҗанов.

“Универсиада өйрәнүләре һәм Уеннар чорында юлларда җитди кыенлыклар тудырылмаячак. Сүз бит бары тик билгеле бер участокларда гына юлны ябу турында бара, шуңа күрә бу хакта хәбәрдар булган транспорт йөртүчеләр башка маршрутны сайлый алачак”, - дип белдерде ТР Яшьләр эшләре, спорт һәм туризм министры Рафис Борһанов.

Чит шәһәрләрдән килүче траспортка килгәндә, чикләүләр зур йөк ташучы транспортка гына кагыла, алар әйләнеч юллардан файдаланачак, “Башка чикләүләр кертелмәячәк”,- дип ассызыклады Фәргать Мөхәммәтҗанов.