Татарстанда предприятиеләрдә эшләүче яшьләрнең Республика телевизион иҗат фестивале старт ала

Бүген Татарстан Республикасы Министрлар Кабинетында предрпиятиеләрдә эшләүче яшьләрнең Республика телевизион иҗат фестивале старт алу темасына брифинг узды. Анда ТР яшьләр эшләре, спорт һәм туризм министры Рафис Борһанов, ТР сәнәгать һәм сәүдә министры урынбасары Гөлнара Әхмәдиева, “Созвездие-Йолдызлык” яшьләр иҗтимагый оешмасы директоры Айдар Гайнетдинов, “ТР предприятиеләре һәм эшмәкәрләре ассоциациясе” эш белән тәэмин итүчеләрнең төбәк берләшмәсе генераль директоры Алексей Пахомов катнашты.

Татарстан Республикасы сәнәгать предприятиеләре яшьләре белән эшчәнлек, дәүләт яшьләр сәясәте стратегик юнәлешләренең берсе санала. Хезмәт кешесенең дәрәҗәсен күтәрү, эшче һәм инженер белгечлекләренең абруен арттыру буенча башкарылган эш кысаларында эшче яшьләрнең Республика телевизион иҗат фестиваленә старт бирелүе дә шул хакта сөйли.

Рафис Борһанов билгеләп узганча, бүгенге көндә яшьләрне предприятиеләргә җәлеп итү буенча төрле эш формалары кулланыла. “Күп кенә предприятиеләрдә яшьләр белән эшләү буенча ставкалар гамәлгә кертелде. Без предприятиеләрдә эшләүчеләрнең уртача яшен киметергә телибез. Яшьләр килсен өчен кызыклы уңайлы мохит тудырырга омтылабыз.

Быел шушы иҗади фестивальгә старт биреп, “Созвездие-Йолдызлык” фестиваленең уңай тәҗрибәсенә таянабыз. Без яшьләрнең предприятиеләргә әйләнеп кайтуы өчен кулдан килгәннең барысын да эшләргә тиеш”, - дип белдерде Рафис Борһанов.

Фестивальдә төрле тармак предприятиеләрендә хезмәт куючы 18 яшьтән алып 35 яшькә кадәр яшьләр катнаша алачак. Катнашучылар үзләре аерым чыгыш ясаган кебек, коллектив белән дә сәхнәгә чыгу хокукына ия.
Фестивальне быелдан башлап ел саен, берничә этапка бүлеп үткәрү ниятләнә. Беренче башлангыч этап сентябрьдә уза. Башлангыч этапта жюри тарафыннан сайлап алынган предприятие командалары фестивальнең зональ этапларында катнашу өчен 3 көнгә шәһәр читендәге ял йортлары һәм санаторий базаларына җыелачак.

“Фестивальне үткәрү инициативасы Татарстан Президенты Рөстәм Миңнеханов тарафыннан хупланды”, - дип ассызыклый Гөлнара Әхмәдиева. Фестиваль эшче яшьләрнең производствода ныклап урнашуына, эшче һәм инженер һөнәрләрне популярлаштыруга ярдәм итәчәк, ди ул.