Татарстанда язгы ташуга каршы чаралар үткәрү өчен махсус төркем булдырылган
Гадәттән тыш хәлләр очраклары буенча Татарстан тупланган резервларның гомуми күләме 6,6 млрд. сумнан артык тәшкил итә. Булдырылган матди ресурслар резервлары күләме 380,6 млн. сум тәшкил итә. Бу хакта ТР Гадәттән тыш хәлләрне кисәтү һәм бетерү һәм янгын куркынычсызлыгын тәэмин итү комиссиясе утырышында Татарстанның гадәттән тыш хәлләр министры урынбасары Николай Суржко сөйләде.
Аның сүзләренә караганда, Татарстанда барлыгы 158 вакытлыча урнаштыру пункты планлаштырылган, аларда 41 меңнән артык кеше урнаша ала.
Николай Суржко, республикада язгы ташуга каршы чаралар үткәрү өчен 17 меңнән артык кешегә исәпләнгән махсус төркем төзелүен, 2,5 мең берәмлек техника һәм 135 берәмлек йөзү чарасы җәлеп ителүен әйтте. Һава разведкасы өчен 5 берәмлек авиация техникасы куллану планлаштырыла.
Татарстан Республикасы Гадәттән тыш хәлләрне кисәтү һәм бетерү һәм янгын куркынычсызлыгын тәэмин итү комиссиясе утырышын Татарстан Республикасы Премьер-министрының беренче урынбасары Рөстәм Нигъмәтуллин үткәрде. Утырыш республиканың барлык муниципаль районнары белән видеоконференцэлемтә режимында узды.