Минтимер Шәймиев Семей шәһәрендә Абай исемендәге театрда булды

Кичә кич белән Казакъстан Республикасының Семей шәһәрендә ТР Дәүләт Киңәшчесе Минтимер Шәймиев, Көнчыгыш-Казакъстан өлкәсе хакиме Бирдебәк Сапарбаев һәм ТР делегациясе әгъзалары Абай исемендәге театрда булдылар. Анда татар диаспорасы вәкилләрен Татарстан Дәүләт бүләкләре белән бүләкләү, Казан һәм ТРның Нурлат районы артистлары, Семей шәһәре Өлкә балет мәктәбенең яшь артистлары катнашында сәнгать осталары концерты булды.

Минтимер Шәймиев кулыннан “Татарстан Республикасының атказанган артисты” исемен һәм күкрәк билгесен Казакъстан милли музыка академиясе доценты Дамир Солтанов алды. Көнчыгыш-Казакъстан өлкәсе Семей шәһәренең талантлы балалар өчен Өлкә махсуслаштырылган балет мәктәбе директоры Камилия Исмәгыйлова “Татарстан Республикасының атказанган сәнгать эшлеклесе” исеменә лаек булды.

Татар сәнгать мәктәбе укытучысы, Халыкара конкурслар лауреаты, Казакъстан милли сәнгать университеты студенты Руслан Тураевка Минтимер Шәймиев Татарстан Республикасы Президентының рәхмәтеннән тыш, концерт баянына сертификат тапшырды.

Татар сәнгать мәктәбенә Минтимер Шәймиев үзенең шәхси коллекциясеннән концерт баяны бүләк итте. Мәктәп директоры Габделхак Ахунҗанов шунда ук баянда уйнап, татар һәм казакъ телләрендә җыр башкарды.

Театр фойесында Минтимер Шәймиев һәм Бирдебәк Сапарбаев журналистларның сорауларына җавап бирделәр һәм кич белән Татарстан Республикасы делегациясе Казанга әйләнеп кайтты.