Татарстанда алкоголь продукциясен сату күләменең кимүе күзәтелә

Татарстанда легаль алкоголь продукциясен сату күләмнәренең күпкә кимүе күзәтелә. Бу хакта бүген ТР Министрлар Кабинетында, республикада алкоголь базары торышы һәм спиртлы продукциянең легальлеге һәм сыйфаты өстеннән контрольгә багышланган брифингта Этил спирты, алкоголь продукция җитештерү, әйләнеше һәм сыйфаты өстеннән дәүләт күзәтчелеген тәэмин итү һәм кулланучылар хокукларын яклау буенча ТР дәүләт инспекциясе башлыгы Игорь Марченко хәбәр итте.

Аның сүзләренчә, сатылу күләмнәренең кимүе, 2013 нче елның 1 нче гыйнварыннан аракы бәясенең минималь бәясе 125 сумнан 170 сумга кадәр артуы белән бәйле. Әмма бәяләр күтәрелүе хәмер куллану кимүенә китермәгән. Моннан тыш, алкоголь продукциясен берәмләп сату буенча легаль базарның кимүенә, исерткечләрнең законсыз әйләнеше фактлары артуы да йогынты ясаган.

Игорь Марченко билгеләп узганча, узган ел, лицензиясез алкоголь сату фактлары үсеше белән сыйфатлана. Әгәр дә 2011 нче елда мондый 90 очрак теркәлгән булса, 2012 нче елда алар 179 ны тәшкил иткән. Кызганычка каршы, агымдагы елда теркәлгән саннар да борчылырга җирлек тудыра. 2013 нче елның беренче яртыеллыгында 87 лицензиясез эшчәнлек факты ачыкланган (чагыштыру өчен: 2012 нче елның шушы чоры эчендә 60 факт теркәлгән).

"2013 нче елның май-июнь аенда Казакъстан Республикасыннан кертелүче һәм сәүдә һәм җәмәгать туклануы нокталарында лицензиясез сатылучы алкоголь продукциясенең законсыз әйләнеше фактларын кисәтүгә аеруча зур игътибар юнәлтелде. Дәүләт алкоголь инспекциясе эчке эшләр органнары хезмәткәрләре белән берлектә, Сарман, Баулы, Балык Бистәсе районнарында, Казакъстаннан исерткечләр кертүче дүрт автомобильне тоткарлады. Нәтиҗәдә 7,5 мең аракы һәм коньяк шешәсе йолып алынды", – дип сөйләде Игорь Марченко. Гаеплеләргә карата административ хокук бозулар турында эшләр кузгатылган. Суд карары буенча, алкогольнең 3 мең данә шешәдән торган бер партиясе юкка чыгарылган.

"Казакъстан продукциясе безгә республиканың көньяк-көнчыгыш районнары (Азнакай, Баулы, Ютазы) аша халык өчен бик кызыктырырлык бәяләрдән кертелә: аракы бәясе 100 сумнан 150 сумга кадәр, коньяк 200 сумнан алып", - ди Дәүләт алкоголь инспекциясе җитәкчесе.
Казакъстан алкоголь продукциясе республика территориясендә законсыз сатылып кына калмый, экспертиза күрсәткәнчә, аның исеме җисеменә бөтенләй туры килми: коньяк исеме астында, буяу матдәләре һәм ароматизаторлар кушылган спиртлы-сулы сыекча тутырылган.
Казакъстсанда җитештерелгән аракыны тикшерү барышында исә, аның ацетон кушылган спиртлы сыекчадан гыйбарәт булуы фаш ителгән. Ацетон кеше тормышы һәм сәламәтлеге өчен бик куркыныч матдә.