Илдар Халиков “Спорт тапшырулары”ның Татарстан белгечләренә таныклыклар тапшырды

Бүген Казанда Татарстан Премьер-министры Илдар Халиков “Спорт тапшырулары” автономияле коммерцияле булмаган оешманың (АКО) Татарстан хезмәткәрләренә квалификацияләрен күтәрү һәм телевидение җиһазлары белән эшләүгә рөхсәт таныклыклары тапшырды. Бу тантанада шулай ук Республика матбугат һәм массакүләм коммуникацияләр агентлыгы җитәкчесе Ирек Миңнеәхмәтов һәм “Спорт тапшырулары” АКО генераль директоры Василий Кикнадзе катнашты.

“Спорт тапшырулары” АКО “Панорама” исеме астында эшли, ул 2009 елда зур спорт чараларын трансляцияләү өчен оештырыла. “Панорама”ның төп бурычлары – Сочидагы Олимпиаданың милли сигналын һәм Казандагы Универсиаданың халыкара сигналын булдыру.

Белгечләр әзерләү өчен компания махсус курслар оештырган. Кайбер белгечләр шул исәптән Казандагы Универсиадада стажировка узганнар. Бүген “Панорама”ның Татарстанлы 47 хезмәткәре ТР Премьер-министры Илдар Халиков кулыннан квалификациясен күтәрү турында таныклык алды.

“Бу таныклык сезгә иң заманча телевидение техникасы белән эшләү хокукын бирә”, - дип мөрәҗәгать итте Василий Кикнадзе курсларны тәмамлаучыларга.

Илдар Халиков үзенең чыгышында белдергәнчә, Казандагы Универсиаданың барышын яктыртуда Татарстанлылар гына түгел, бәлки Россиянең 20 төбәгеннән белгечләр катнашкан. “ Универсиаданы болай яктырту, үзебездәге һәм чит илдәге күп белгечләрнең бәясе буенча, кайчандыр булган Универсиадаларга караганда иң яхшысы. Һәм бу Василий Кикнадзе һәм аның командасының тырыш хезмәте, алар бу ике атналык сынауга 3 ел әзерләнделәр”.

Татарстан Президенты һәм үз исеменнән Илдар Халиков “Панорама” хезмәткәрләренә, аларның башкарган эшләре өчен, рәхмәт белдерде.

Үз чиратында Василий Кикнадзе Татарстан җитәкчелегенә рәхмәт белдерде, аның сүзләренчә, Республика Хөкүмәте ярдәменнән башка Универсиада ярышларын сыйфатлы итеп күрсәтү мөмкин булмас иде.