Универсиада: 29 июнь-16 июль көннәрендә медицина ярдәме сораган 8 мең 698 мөрәҗәгать теркәлгән

Казанда уза торган Универсиада чорында – 29 июнь-16 июль көннәрендә, медицина ярдәме күрсәтүне сорап, 8698 кеше мөрәҗәгать иткән. Мөрәҗәгатьләрнең 5511е спорт объектларына, 2270е Универсиаданың Медицина үзәгенә туры килә.

Барлык мөрәҗәгатьләрнең 2758е ( 1806сы – спортчы) - чит ил гражданнары, 5940ы (145 спортчы) Россия гражданнары тарафыннан ясалган. Бу хакта бүген матбугат очрашуында ТР Сәламәтлек саклау министры Айрат Фәррахов хәбәр итте.

Министр сүзләренчә, көннәрнең эссе торуы табибларны да, спортчыларны да мобилизацияләгән, әмма күрсәткечләргә йогынты ясый алмаган. “Без бик ныклап әзерләндек, белгечләрне кирәгеннән дә артык хәзерләп куйдык. Эссе вакытта марафон үткәрелгән башка чит илләрнең тәҗрибәсен өйрәндек”, - диде Айрат Фәррахов.

“Спортчыларга гына түгел, бәлки хезмәт күрсәтүчеләргә, иминлек һәм полиция хезмәткәрләренә дә җиңел булмады. Мөмкин булган барлык җирдә суга ирекле үтү юлы, кояштан саклану урыннары каралган, ачык төстәге киемнәр кияргә, су күп эчәргә киңәш ителде. Өстәмә туклану урыннары куелган иде”,-дип хәбәр итте ТР сәламәтлек саклау министры. Аның сүзләренчә, бу чараларның барысы да, медицина ярдәме сораган мөрәҗәгатьләр күп булмасын өчен ярдәм итте.