Казанда XXVII Бөтендөнья җәйге Универсиадасы тәмамланды

Бүген Казанда Kazan Arena стадионында студентларның XXVII Бөтендөнья уеннарының ябылу тантанасы узды. Тантанада Россия Федерациясе Хөкүмәте Рәисе Дмитрий Медведев, Татарстан Президенты Рөстәм Миңнеханов, FISU президенты Клод-Луи Гальен, РФ вице-премьеры Аркадий Дворкович, ТР Дәүләт Киңәшчесе Минтимер Шәймиев һәм башка рәсми затлар катнашты.

Тантнананы ачып җибәргәч, Россия Премьер-министры Дмитрий Медведев үз чыгышында казанлыларны, Универсиадада катнашучыларны һәм җанатарларны сәламләде.

"Хәзер дулкынландыргыч һәм ямансу минутлар булачак. Без 2013 елгы Универсиада белән саубуллашабыз. Безнең өчен аны Россиядә уздыру, Казанда уздыру - зур мәртәбә, - диде РФ Хөкүмәте башлыгы. – Мин бөтен дөньяга бу студентлар спортының искиткеч бәйрәмен бүләк иткәннәрнең барысына да рәхмәт белдерәм. Тренерларга рәхмәт, спортчыларга рәхмәт, җанатарларның барысына да рәхмәт. Ниһаять, Казанга рәхмәт. Сездән башка бу Уеннар мөмкин булмас иде.12 көн эчендә ярышканнарның барысы да булдырдылар. Сез һәрберегез үз илегез өчен ярыштыгыз, үзегезнең спорт рухыгызны, җиңү теләген, ихтыяр көчен күрсәттегез. Бу сыйфатларыгызны гомер буена саклап калыгыз!"

"Алда әле сезне бихисап уңышлар һәм казанышлар көтә. Әмма спорттагы җиңү үзенә бер төрле. Аның өчен күп көч куярга кирәк һәм күпләргә ул зур спортка, биниһая карьерага юл ача, - дип мөрәҗәгать итте Дмитрий Медведев спортчыларга. – Уңышлар сезгә!"

"Казанны Универсиада башкаласына әверелдергәннәрнең барысына да аерым рәхмәт. Ышанам ки, безнең кунаклар бу гүзәл шәһәрне мәңгегә яратып калдылар, - дип белдерде Д.Медведев. – Универсиада тәмамланганнан соң монда яңа юллар, метро станцияләре һәм, билгеле инде, спорт объектлары калалчак, аларга йлкәннәр дә, балалар да йөриячәк. Яңа чемпионнар тәрбияләнәчәк спорт объектлары ул. Шунысы бик мөһим, бу спорт объектларына сәламәтлекләре чикләнгәннәр дә йөри алачак, аларның барысында да каршылыксыз керү урыннары эшләнгән".

"Бүген бу стадионда меңләгән волонтерлар. Нәкъ менә сез спортчыларның да, җан атарларның да Казанда булуын уңайлы иттегез. Сезнең кунакчыллыгыгыз, киң күңеллелелегез, дустанә мөнәсәбәтегез бу көннәрдә Казанда булганнарның хәтеренә уелып калачак", - дип мөрәҗәгать итте Россия Премьер-министры волонтерларга.

"Универсиада ярышларын карганда мине җанатарларның үз спортчыларына чын күңелдән көч биреп утырулары сөендерде. Нәкъ менә җанатарлар аларга җиңәргә ярдәм итте. Нәкъ менә сезнең ярдәмегез белән спортның күп төрләрендә Олимпиада нәтиҗәләренә тиң булырлык казанышлар яуланды", - диде Дмитрий Медведев, җанатарларга мөрәҗәгать итеп.

"Мин Казандагы Универсиада Сочи Олимпиада уеннарының бик лаеклы прологы булды дип саныйм, - дип белдерде Дмитрий Медведев. – Ул спортчылар өчен дә, тренерлар өчен дә, бөтен илебез өчен дә җитди сынау булачак".

"Гадел көрәш, ярдәмчеллек, бер-береңә ышаныч спортта гына түгел, кешеләр, илләр арасындагы мөнәсәбәттә дә кирәк, - дип билгеләп үтте РФ Хөкүмәте Рәисе. – Ышанам ки, сезнең кайберләрегез Казанда үз өметен аклагандыр. Ышанам ки, сез монда яңа дуслар тапкансыздыр, кемнәрдер, бәлки, үз мәхәббәтен дә тапкандыр. Бәхетле булыгыз, сезгә яңа җиңүләр телим. Очрашуларга кадәр!"

Стадионда искиткеч күз явын алырлык тамаша башланды, анда Гарик Сукачев, Дина Гарипова, Алина Кәримуллина, Нюша, "Би-2", "Каста", "Мумий Тролль" төркемнәре чыгыш ясады. Тантана кунакларына сәламләү сүзләре Казан мэры Илсур Метшин мөрәҗәгать итте. Ә FISU президенты Клод-Луи Гальен Казандагы Уеннарны ябык дип белдерде.

Шуннан соң Универсиада флагын Казаннан Көньяк Корея шәһәре Кванджуга тапшыру тантанасы булды, анда 2015 елда киләчәк Бөтендөнья студентларының җәйге уеннары узачак. Тантанада катнашучыларга сәламләү сүзе белән Кванджу мэры мөрәҗәгать итте, ә сәхнәдә Корея артистлары чыгыш ясады.

Арена өстендәге экраннарда секундларны артка таба санау башланды, ул тәмамлангач, стадион өстендәге Универсиада уты сүндерелде. "Мы разбиваемся" дигән финал җырын Земфира башкарды.