10 “УАЗ” автомобиле ТР Хайваннар дөньясы объектларыннан файдалану һәм саклау идарәсенә тапшырылды

Бүген Татарстан Премьер-министры Илдар Халиков Казанда Татарстан Республикасының Хайваннар дөньясы объектларын саклау һәм алардан файдалану идарәсе каршында, районара инспекцияләргә өр-яңа 10 “УАЗ” автомобильләре ачкычларын тапшырды.

Хөкүмәт башлыгы билгеләп узганча, урманнарны, хайваннар, тереклек, үсемлекләр дөньясын саклау – идарәнең, шулай ук Экология һәм табигый ресурслар, Урман хуҗалыгы министрлыкларының төп бурычы. “Идарәнең яхшы эш нәтиҗәләрен күрәбез. Ул административ җәзалар санында гына түгел, иң беренче чиратта, республика урманнарында хайваннарның баш саны артуында чагылыш таба.

Татарстан Президенты да идарәгә җитди мөнәсәбәттә, чөнки ул сезнең хезмәтегезнең асылын, аның катлаулылыгын, куркыныч булуын да аңлый. Президентның, штатны арттыру һәм өстәмә техника белән тәэмин итү турындагы карары – шуның ачык дәлиле”, - ди Илдар Халиков.
“Мин, профессиональ затлар кулына килеп эләккән шушы техниканың, Татарстанның экологиясе һәм хайваннар дөньясын саклау өчен тагын да күбрәк файда китерүен телим”, - ди ул.

Бүген Нурлат, Теләче, Азнакай, Бөгелмә, Лаеш, Тукай, Спасс, Мамадыш, Тәтеш, Чирмешән районнары бүлекләре яңа автомобильгә хуҗа булдылар.

Татарстан Республикасының Хайваннар дөньясы объектларын саклау һәм алардан файдалану идарәсе башлыгы Дмитрий Иванов журналистларга хәбәр иткәнчә, 1,5 ел эчендә автомобильләр паркы тулысынча диярлек яңартылган, 26 машина кайтарылган. Лениногорски бүлеген якын киләчәктә шулай ук яңа автомобиль белән тәэмин итү ниятләнә. Моннан тыш, тиздән 20 кардан йөрү машинасын алу ниятләнә, кышкы вакытта хезмәткәрләр шушы техникада хәрәкәтләнә.

Идарә башлыгы браконьерлык очракларының артуын ассызыклап үтте. Ул билгеләп узганча, браконьерлык фактлары буенча узган елда 233 административ, 9 җинаять эше кузгатылган. Быел беренче яртыеллыкта 160 административ эш ачылган, узган елның шушы чоры белән чагыштырганда, бу күбрәк, былтыр беренче алты ай эчендә 100 административ беркетмә төзелгән булган.