Минтимер Шәймиев Григорий Рапота өчен борынгы Болгар шәһәре буйлап экскурсия уздырды

Бүген Татарстан Республикасы Дәүләт Киңәшчесе, “Яңарыш” Республика фондының Попечительләр Советы рәисе Минтимер Шәймиев Союздаш дәүләтнең дәүләт секретаре Григорий Рапота өчен борынгы Болгар шәһәре буйлап экскурсия уздырды һәм аны бу җирдә сакланган тарих һәм мәдәниятнең уникаль ядкәрләрен яңадан торгызу буенча “Яңарыш” фонды эшчәнлеге белән таныштырды.

Экскурсия Болгар цивилизациясе музее белән берләштерелгән яңа елга вокзалыннан башланды. ТР ФАнең Ш.Мәрҗани исемендәге Тарих институтының археологик тикшеренүләр милли үзәге мөдире Айрат Ситдыйков кунакка музей экспозициясен күрсәтте, Болгар цивилизациясенең барлыкка килүе һәм Идел буе Болгар дәүләте тарихы турында җентекләп сөйләде.

Алга таба Минтимер Шәймиев һәм Григорий Рапота 922 нче елда Идел буе болгарлары тарафыннан рәсми рәвештә ислам динен кабул итүгә багышланган Истәлек билгесендә, Җәмигъ мәчеттә, Хан сараенда, Һөнәрчелек остаханәләрендә, Табиб йортында, Кара һәм Ак пулатларда, Кече манарада, Ак мәчеттә һәм Икмәк музее экспозициясендә булдылар.

Союздаш дәүләтнең дәүләт секретаре экскурсия барышында борынгы шәһәрнең тарихы, Болгар музей-саклаулыгының бүгенгесе һәм киләчәге белән кызыксынып, бик күп сораулар бирде.

Ул экскурсия тәмамланганда үзенең тәэсирләре белән уртаклашты. “Борынгы Болгар шәһәрендә булудан бик тирән тәэсирләр кала һәм ике төрле хис барлыкка килә. Бер яктан, илнең бай тарихына һәм монда башкарылган эшкә соклану. Мин шундый кыска вакыт эчендә, тарихи һәйкәлләрне яңадан торгызу буенча шул кадәр күп эш башкарып булуын көтмәгән идем. Икенче яктан, үзебезнең тарихны бик аз белүдән үзеңдә кимчелек тою. Нәтиҗәдә, аны безгә укырга, укырга һәм укырга дигән фикергә килдем. Монда, Болгарда, бик зур тарихи катлау ачыла, минемчә, ул кешеләргә, укучыларга һәм студентларга билгесез. Бу дөрес түгел, аның турында күбрәк белсеннәр өчен, чара күрергә кирәк”, - дип белдерде ул.

Кунакларны ТР Дәүләт Советы рәисе урынбасары Александр Гусев, Спас муниципаль районы башлыгы Камил Нугаев һәм башка рәсми затлар озата йөрделәр.