Татарстан муниципаль берәмлекләре арасындагы смотр-бәйгедә җиңүчеләргә 100 автомобиль тапшырылды

Бүген муниципаль берәмлекләр арасында уздырылган республика смотр-бәйгенең җиңүчеләренә Татарстан парламенты бинасы каршындагы мәйданда 100 “Нива” автомобиле тапшырылды. Тантаналы чара ТР Президенты Рөстәм Миңнеханов, Дәүләт Советы рәисе Фәрит Мөхәммәтшин, ТР Премьер-министры урынбасары вазифаларын башкаручы Юрий Камалтынов, ТР Муниципаль берәмлекләре советы рәисе Минсәгыйть Шакиров катнашында узды.
Муниципаль берәмлекләр, шул исәптән муниципаль районнар, авыл җирлекләре, шәһәр округлары, алардагы муниципаль учреждениеләр арасында әлеге смотр-бәйге республикада 2011 елдан бирле үткәрелә. Аны уздыру турындагы карар ТР Муниципаль берәмлекләре советының Президиум утырышында кабул ителгән иде. Бәйгенең максаты җирле үзидарәләр эшчәнлегенең нәтиҗәлеген күтәрүдән гыйбарәт.
Быелгы смотр-бәйгегә муниципалитетлардан барлыгы 189 заявка алынган булган. Аларны бәяләгәндә муниципаль берәмлекләрнең үз керемнәренең үсеш темплары, халкының динамикасы, җан башына туры китереп сафка бастырылган торак мәйданы, кече һәм урта эшмәкәрлеккә ярдәм программаларын гамәлгә ашыруның торышы, җирлектә бер кешегә туры килгән сәүдә мәйданы, авыл җирлекләрендә мөгезле эре терлек саны, гражданнарның үзмәшгульлеген тәэмин итүгә булышлык итү, уздырылган социаль-мәдәни, спорт чараларының саны һ.б. критерийлар үзәккә куелган. Шәһәр округларын бәяләгәндә муниципаль учреждениеләрнең эшчәнлек күрсәткечләре дә исәпкә алынган. Нәтиҗәдә оештыру комитеты 86 муниципаль берәмлекне (нигездә, авыл җирлекләре) һәм Казан белән Чаллыдагы 14 муниципаль учреждениене җиңүче дип тапкан. Җиңүче муниципалитетлар башлыкларына дипломнар һәм “Нива” автомобильләре ачкычларын Рөстәм Миңнеханов белән Минсәгыйть Шакиров тапшырды.
Татарстан Президенты Республика көне алдыннан муниципаль берәмлекләрнең, аеруча, авыл җирлекләре дәрәҗәсендәге муниципалитетларның эшчәнлеген бәяләүнең матур традициягә әйләнүен билгеләп үтте. Президент ассызыклаганча, Татарстанда соңгы өч ел эчендә муниципалитетларның транспорт проблемасын чишү өчен 618 автомобиль тапшырылган. Бүген моңа тагын 100 автомобиль өстәлде.
Рөстәм Миңнеханов чыгышында муниципалитетларның дәүләтнең нигезе булуын билгеләп үтте. “Авыл җирлекләре хакимият белән халык бер мәйданда яши торган урын. Шуңа да анда җитешсезлекләр, проблемалар да, казанышлар да ачык күренә. Илебез сезнең кебек урыннарда хакимиятнең булуын тәэмин итүче, эшен оештыручы кешеләргә нигезләнә”, - дип мөрәҗәгать итте ул җирле үзидарә органнары башлыкларына. Президент җирлекләрдә гамәлгә ашырылучы чиста су белән тәэмин итү, юллар сузу, клублар, ФАПлар төзү һ.б. программаларның халыкның ихтыяҗларны канәгатьләндерүгә хезмәт итүен ассызыклап, аларның алга таба да дәвам итәчәген белдерде. Рөстәм Миңнеханов җирле үзидарәләрне җиңүләре һәм Республика көне белән котлап, уртак эшчәнлектә уңышлар теләде.
ТР Муниципаль берәмлекләре советы рәисе Минсәгыйть Шакиров җиңүчеләрне тәбрикләп, Татарстанның җирле үзидарәләрне үстерү буенча илдә лидер төбәкләрнең берсе булуын ассызыклады. Ул җирле үзидарәләрне үстерү буенча республика җитәкчелеге тарафыннан күрелә торган чараларга тукталды. Аерым алганда, авыл җирлекләре башлыкларының хезмәт хакларын күтәрү, лаеклы пенсия белән тәэмин итү чараларына тукталып үтте. Муниципалитетларга төрле грантларда катнашу мөмкинлеге тудырылуын искәртте.
Минсәгыйть Шакиров бүгенге тантанада тагын бер күңелле яңалык җиткерде: ТР Президенты авыл җирлекләренә һәрберсе 1 млн сумлык булган 104 республика гранты бүлү турында карар иткән.
ТР Муниципаль берәмлекләре советы рәисе Президентка, Хөкүмәткә, Дәүләт Советына җирле үзидарәләргә ярдәмнәре өчен барлык муниципалитетлар исеменнән зур рәхмәт белдерде. “Боларның барысы да җирле үзидарәләр эшчәнлегенең нәтиҗәлелеген күтәрү өчен эшләнә. Ул үз чиратында халыкның яшәү сыйфатын яхшыртуга ярдәм итәчәк”,-дип ассызыклады Минсәгыйть Шакиров.