Минтимер Шәймиев “Төркия радиосы һәм телевидениесе”корпорациясе вәкилләре белән очрашты

Бүген “Казан” ат спорты комплексында Татарстан Республикасы Дәүләт Киңәшчесе, “Яңарыш” Республика Фондының Попечительләр Советы рәисе Минтимер Шәймиев “Төркия радиосы һәм телевидениесе” (ТРТ) корпорациясе вәкилләре – генераль директоры Ибраһим Шаһин, аның урынбасары Әхмәт Коюнджу, “ТРТ Аваз” телевезион каналы директоры Аднан Суэр һәм бу каналның алып баручысы Айгөл Келеш-Шәрипова белән очрашты.

Очрашу башында кунаклар Казан Кремлендә алган тәэсирләре белән уртаклаштылар, Кол-Шәриф мәчете аларда аеруча соклану тудырган. Бу мәчетне яңадан торгызу тарихын сөйләп, Минтимер Шәймиев ТРТ делегациясен “Яңарыш” Фондының эшчәнлеге белән таныштырды һәм аларны борынгы Болгар шәһәренә, яңа Ак мәчетне карарга чакырды.

ТРТ директоры Ибраһим Шаһин Минтимер Шәймиевкә Төркия Республикасының тарихи мирасын саклау турында телерадиокомпаниянең программа һәм проектлары хакында сөйләде. Ул Минтимер Шәймиев турында, аның Татарстан Президенты сыйфатында да, “Яңарыш” Фондына нигез салучы буларак та эшчәнлеге хакында күп ишетүен ассызыклады. “Без Сезнең изге эшләрегез белән горурланабыз һәм сокланабыз, алар турында үзебезнең канал программаларында сөйләргә әзербез”,- диде ул.

Очрашу барышында мәдәният һәм сәнгать өлкәсендәге перспективалы юнәлешләр турында фикер алыштылар. Минтимер Шәймиев соңгы елларда Татарстан Республикасы белән Төркия Республикасы арасында мәдәни бәйләнешләрнең нәтиҗәле үсеш алуын билгеләп үтте.

ТРТ корпорациясе делегациясе Казанга кичә килгән иде, бүген иртән Татарстан Республикасы Президенты Рөстәм Миңнеханов катнашында “Төркия радиосы һәм телевидениесе “ корпорациясе һәм “Татмедиа” ААҖ арасында хезмәттәшлек турындагы Килешү имзаланды.

Кунаклар шулай ук ТР Дәүләт Советы рәисе Фәрид Мөхәммәтшин, ТР мәдәният министры Айрат Сибгатуллин белән очраштылар, “Яңа гасыр” телерадиокомпаниясендә булдылар, аларны компаниянең генераль директоры Илшат Әминов озата йөрде, “Татарлар” программасын төшерүдә катнаштылар.