Илдар Халиков: Бүген Татарстан Республикасында капиталь ремонт программасы буенча планлаштырылган барлык мәктәпләр дә ачылды

Бүген ТР да капиталь ремонт программасы буенча планлаштырылган барлык мәктәпләр дә ачылды. Бу хакта бүген ТР Премьер-министры журналистлар белән очрашуда белдерде.

Республикада мәктәпләрне капиталь ремонтлау программасы икенче ел гамәлгә куела. Узган ел 173 уку йорты ремонтланса, быел – 160.
“Бу муниципаль берәмлекләр башлыклары һәм мәктәп директорлары еш күтәргән проблема булды. Бу программа кыйммәт булуга карамастан, дәвам итәчәкбез”, - дип ассызыклады Татарстан Хөкүмәте җитәкчесе.

Илдар Халиков мәгълүматларына караганда, агымдагы елда мәктәпләрне капиталь ремонтлауга 2,5 млрд сум бүлеп бирелгән. Шулай ук, ул агымдагы елда республиканың 200 мәктәбендә ремонт эшләрен башкаруда мәктәпне тәмамлаучылар ярдәм иткән.
“ТР Президенты Рөстәм Миңнехановның чакыруы хупланды, киләсе елда да алар үз мәктәпләренә ярдәм итәр дип ышанам”, - дип ассызыклады ул.

Татарстан балаларына белем бирү процессын тәэмин итәргә ярдәм итүче тагын бер юнәлеш – мәктәп автобуслары. Быел укучыларны 600 гә якын автобус уку йортларына илтә. ГЛОНАСС махсус системасы кертелү сәбәпле, узган уку елында укучылар катнашында 1 юл-транспорт һәлакәте дә теркәлмәгән.
“Быел республика мәктәпләре өчен ГЛОНАСС системалы тагын 103 автобус сатып алыначак”, - дип билгеләп үтте республика Премьер-министры.