Социаль юнәлешле коммерцияле булмаган оешмалар өчен субсидияләргә конкурска заявкалар 10 нчы сентябрьдән кабул ителә

Татарстан Республикасында социаль юнәлешле коммерцияле булмаган оешмаларга финанс ярдәме күрсәтү турында бүген брифингта Татарстан Республикасының Иҗтимагый палата рәисе Анатолий Фомин сөйләде. Брифинг гадәттәгечә Татарстан Республикасы Хөкүмәт Йортында, республиканың барлык муниципаль районнары белән видеоконференцэлемтә режимында узды.

Анатолий Фомин хәбәр иткәнчә, Татарстанда 6 меңгә якын коммерцияле булмаган оешма эшли. Җәмгыятьтәге социаль проблемаларны хәл итүгә юнәлтелгән, федераль һәм республика социаль проектлар конкурсларында катнашу, иҗтимагый оешмаларга дәүләт ярдәме күрсәтү формаларының берсе булып тора.

Республикада социаль юнәлешле коммерцияле булмаган оешмаларның Россия Федерациясе Президенты, Татарстан Республикасы Министрлар Кабинеты, шулай ук тармак министрлыклары һәм ведомстволары грантларына конкурслар уза.

2013 елда - ТР Министрлар Кабинеты карары белән, ТР территориясендә социаль әһәмияткә ия проектларны гамәлгә ашыруда катнашучы коммерцияле булмаган оешмалар өчен ТР Министрлар Кабинеты грантларына республика конкурсын уздыру өчен 10 млн. сум акча бүлеп бирелгән. Бу бәйгегә шулай ук заявкаларны 10 нчы сентябрьдән тапшыра башларга була һәм 14 октябрьгә кадәр дәвам итә. Конкурска нәтиҗә ясау 2013 елның ноябрь уртасында булачак.

Конкурс “Гражданнар җәмгыяте һәм иҗтимагый үзидарә институтлары үсеше, гражданнарның хокукларын яклау”, “Яшьләргә белем, патриотик һәм рухи-әхлакый тәрбия бирү, яшүсмерләр һәм яшьләр арасында тискәре күренешләрне алдан кисәтү”, “Мәдәният һәм сәнгать, милләтара һәм диннәрара мөнәсәбәтләрне ныгыту”, “Гаиләне, аналар һәм балаларны яклау, өлкән яшьтәгеләргә һәм инвалидларга социаль ярдәм”, “Сәламәтлекне саклау, сәламәт тормыш рәвешен пропагандалау”, “Экология һәм тирә-як мохитне саклау”, “Физик тәрбия һәм спорт” кебек номинацияләр буенча уздырыла.

Анатолий Фомин белдергәнчә, гомумән социаль юнәлешле проектларны гамәлгә ашыру өчен республиканың коммерцияле булмаган оешмалары үзләренең устав эшчәнлегенә грант рәвешендә якынча 95 млн. сум алачаклар.