Татарстанга 2013 елга энергияне сакчыл тоту һәм энергетик нәтиҗәлелекне күтәрү өлкәсендә төбәк программаларын гамәлгә кертү өчен субсидияләр бирү турында килешү имзаланды

Бүген Татарстан Республикасы Хөкүмәте Йортында 2013 нче елга Татарстан Республикасы бюджетына энергияне сакчыл тоту һәм энергетик нәтиҗәлелекне күтәрү өлкәсендә төбәк программаларын гамәлгә кертү өчен федераль бюджеттан субсидияләр бирү турындагы килешү имзаланды
Документка Татарстан Республикасы Премьер-министры Илдар Халиков һәм РФ энергетика министры урынбасары Антон Инюцин кул куйды.

РФ энергетика министры урынбасары Антон Инюцин хәбәр иткәнчә, Килешү кысаларында Татарстан 2013 нче елга федерациянең 28 субъектына каралган 5,7 млрд. сумның 442 млн. сумын алачак. Антон Инюцин сүзләренчә, Татарстан энергияне сакчыл тоту һәм энергетик нәтиҗәлелекне күтәрү өлкәсендә финанслау күләме буенча лидер – төбәкләр өчлегенә керә. Ул шулай ук, бүген бигрәк тә энергияне сакчыл тоту өлкәсендә гражданнарны укыту , энергияне сакчыл куллану һәм энергия нәтиҗәлелеге идеяләрен популярлаштыру мөһим, дип билгеләде.

Татарстан Республикасы Премьер-министры Илдар Халиков, Татарстан мондый Килешүләр имзалана торган беренче төбәк буларак сайланган өчен, Россия Энергетика министрлыгына Татарстан Республикасы Хөкүмәте исеменнән рәхмәт белдерде. Ул шулай ук Татарстан инде өченче ел энергияне сакчыл тоту һәм энергетик нәтиҗәлелекне күтәрү өлкәсендә федераль программаны тормышка ашыруда катнаша һәм федераль субсидияләр ала, дип билгеләде. Илдар Халиков сүзләренчә, программаларда федераль акчаларны куллану тагын да яхшы нәтиҗәгә ирешергә мөмкинлек бирә.
Бүген Татарстанда энергиянең нәтиҗәлелеген мониторинглау системасы кертелә, бу шулай ук энергияне һәм акчаларны экономияләргә мөмкинлек бирәчәк, дип искәртте ТР Премьер-министры.