Рөстәм Миңнеханов: Индустриаль парклар - кече һәм урта бизнесны активлаштыру алымнарының берсе

Бүген Казанда “Химград” технополисында Россия индустриаль парклары ассоциациясенең “Россиядә индустриаль парклар үсеше проблемалары һәм перспективалары” темасына түгәрәк өстәл утырышы узды. Аның беренче өлешендә Татарстан Республикасы Президенты Рөстәм Миңнеханов катнашты.

Утырышта катнашучыларны сәламләп, Президент илдә формалашып килүче индустриаль парклар тәҗрибәсенең Татарстанда да бик уңышлы тупланып килүен ассызыклап узды. Ул бүгенге утырышның тәҗрибә уртаклашу, фикер алышу өчен әһәмиятле булуын билгеләп үтте. Рөстәм Миңнеханов Яр Чаллыда дизель двигательләрен ремонтлау буенча завод базасында индустриаль парк булдыру идеясе тууы һәм, нәтиҗәдә, бик зур, мәйданын 500 мең квадрат метр тәшкил иткән “Мастер” Кама индустриаль паркы пәйда булуы турында сөйләде. Татарстан җитәкчесе ассызыклап узганча, индустриаль парклар үсеше республика һәм федераль хакимият ярдәменә мохтаҗ. Мондый паркларны үз химаясе астына алучы эре оешмалар булуы зарур.

Аның сүзләреннән аңлашылганча, хәзерге вакытта “Мастер” КИП һәм “Химград” технополисы аягында нык басып тора һәм үз-үзен тәэмин итә алырга сәләтле. “Без республикада муниципалитетларда индустриаль мәйданчыклар булдыру бурычын күздә тотабыз. Индустриаль парклар җитди потенциалга ия дип саныйм”, - дип белдерде Рөстәм Миңнеханов. Президент индустриаль парклар ассоциациясенең инновацияле төбәкләр ассоциациясе белән элемтәдә торуы мөһимлеген дә шәрехләп узды.

“Индустриаль парклар тармагына күзәтү: нәтиҗәлелек күрсәткечләре һәм үсеш фаразлары” темасына ассоциациянең башкарма директоры Денис Журавский чыгыш ясады. Ул хәбәр иткәнчә, Россиянең 33 төбәгендә индустриаль парклар эшли. Татарстанның “Мастер” КИП һәм “Химград” технополисы активлык күрсәтеп, ассоциациягә беренчеләрдән булып кергән. Аның сүзләренә караганда, чит илләр белән чагыштырганда, безнең илдә бу тармак әле бик яшь. Ассоциация чит илләргә чыгып, Россиядәге индустриаль парклар үсешен күздә тотып, инвесторлар җәлеп итүне кайгырта. Хәзерге вакытта индустриаль мәйданчыклар булдыру проектлары белән Россиянең 65 төбәге теркәлгән. Быел индустриаль парклар булдыру буенча 450-500 проект тапшырылган.

Рөстәм Миңнеханов индустриаль парклар турында мәгълүматның электрон базада туплануы һәм даими төстә яңартылып торуы зарурлыгына басым ясады. Ул шулай ук индустриаль парклар ассоциациясе эшчәнлеге белән РФ Икътисади үсеш министрлыгы кызыксынып торырга тиеш, дип саный. “Ассоциациягә билгеле бер вәкаләтләр бүлеп бирергә кирәк. Без кешеләрне эшләргә өйрәтергә тиешбез. Халык продукция җитештереп, аны сата белергә тиеш”, - дип җөпләде Президент һәм ассоциация эшчәнлегендә ярдәмгә ихтыяҗ туа калса, Татарстан тарафыннан хезмәттәшлек һәм теләктәшлек күрсәтеләчәгенә ышандырды.