Алексей Улюкаев Казанда югары технологияләр өлкәсендәге технопарк – ИТ-парк эшчәнлеге белән танышты

Бүген Россия Федерациясе икътисадый үсеш министры Алексей Улюкаев Казанда югары технологияләр өлкәсендәге технопарк – ИТ-парк эшчәнлеге белән танышты. Исегезгә төшерәбез, Алексей Улюкаев Казанга бер көнлек эш визиты белән килде. Көннең беренче яртысында ул Татарстан Республикасы Президенты Р.Н. Миңнеханов белән “КАМАЗ” ААҖдә булды (Чаллы), “Алабуга” МИЗ эшчәнлеге белән танышты, “А Плюс парк Алабуга” индустриаль паркын төзи башлау тантанасында катнашты.
Казанга килүгә Россия Федерациясе икътисадый үсеш министрлыгы башлыгы Татарстан Республикасы Президенты Р.Н. Миңнеханов озата баруында “Идея” технопаркында булды, аннары аңа ГЛОНАСС +112 системасын тәкъдир иттеләр.
Шуннан соң Татарстан Республикасы Премьер-министры урынбасары – Татарстан Республикасы мәгълүматлаштыру һәм элемтә министры Роман Шәйхетдинов Алексей Улюкаевка “Электрон Татарстан” проектын күрсәтте, гражданнарга электрон рәвештә дәүләт һәм муниципаль хезмәт күрсәтүләр мөмкинлеге турында сөйләде.
Казан ИТ-паркы директоры Антон Грачев 2012 елда әлеге мәйданчык эше йомгаклары турында сөйләде: Казан ИТ-паркы табыш 4,7 млрд. сум, монда 2180 хезмәткәр эшли, ИТ-парктерриториясендә 58 компания-резидент урнашкан. Казан ИТ-паркында Дата-үзәк – Tier lll тарафыннан сертификацияләнгән күрсәткечләрне эшкәртү үзәге урнашкан. Россиядә мондый үзәк алтау. Моннан тыш, Алексей Улюкаевка Чаллыдагы икенче ИТ-парк турында да сөйләделәр.
Казан ИТ-паркы Бизнес-инкубаторында Россия Федерациясе икътисадый үсеш министрына RoadAR проектын (навигация системасын), шулай ук хокук бозуларны ачыклау һәм юл хәрәкәте иминлеге өлкәсендәге күрсәткечләрне эшкәртү буенча инновацион система – “Автодория”не күрсәттеләр.
Аннан соң табибларны укыту һәм квалификацияләрен арттыру өчен робот-симуляторлар булдыручы “Эйдос” компаниясе проекты тәкъдим ителде.
Аннары ИТ-парк конференц-залында Татарстан Республикасының инновацион инфраструктурасын үстерү һәм Россия инновацион регионнары ассоциациясенең Россия Федерациясе Икътисадый үсеш министрлыгы һәм Россия Федерациясе Финанс министрлыгы белән хезмәттәшлеге мәсьәләләре буенча киңәшмә уздырылды.