Татарстан нефть, газ, химия форумында катнашучыларның дүрттән өче анда кабат катнашырга тели

5-7 нче сентябрьдә Казанда үткән Татарстан нефть, газ, химия форумы РФ нефть, газ тармагының иң зур вакыйгаларының берсе булды. Бу хакта бүген ТР Хөкүмәте Йортындагы брифингта “Казан ярминкәсе” ААҖ генераль директоры Лев Семенов хәбәр итте.

Аның сүзләренчә, форум кысаларында үткән “Нефть, газ. Нефтехимия” күргәзмәсе Россиядә алдынгылар рәтендә. Ел саен анда катнашучылар саны 10-12 процентка арта, ә быел анда 250дән артык компания тәкъдим ителгән.

Бу юлы күргәзмә мәйданнары, үткән ел белән чагыштырганда, 41 процентка зурайган. «Татнефть» Татарстан нефтенең 70 еллыгына багышланган экспозиция тәкъдим иткән.

Күргәзмәдә беренче тапкыр “Белнефтехим” дәүләт корпорациясе исеме астында Белоруссия компанияләре күрсәтелгән.

Форум кысаларында 4 тармак күргәзмәсе эшләде: “Нефть, газ. Нефтехимия”, “Экотехнология һәм XXI гасыр җиһазлары”, “Пластик & Каучук”, “Geo-Казан: Геологоразведка. Геодезия. Картография”. Беренче тапкыр вакансияләр ярминкәсе узды, анда ТРның 11 предприятиесе катнашты.

Моннан тыш, форумда фәнни-гамәли конференцияләр, түгәрәк өстәлләр оештырылды.
Татарстан нефть, газ, химия форумында барлыгы 1,5 меңнән артык делегат катнашты.

Лев Семенов сорашып белешү мәгълүматларын җиткерде: катнашучыларның 80 проценттан артыгы куелган максатларына ирешкән, ә дүрттән өче тагын бер кат монда килергә теләк белдергән.