Татарстан Республикасында барлык 45 муниципаль берәмлектә социаль объектларга һәм торак йортларга җылылык җибәрү башланды

Татарстан Республикасында, агымдагы җылы һава торышына карамастан, барлык 45 муниципаль берәмлектә җылы бирү башлану турында карар кабул иткәннәр һәм социаль объектларга һәм торак йортларга җылылык җибәрә башлаганнар. Бу хакта бүген Татарстан Республикасы Хөкүмәте Йортында узган киңәшмәдә Татарстан Республикасы төзелеш, архитектура һәм торак-коммуналь хуҗалык министры Марат Айзатуллин хәбәр итте.

Республика Рәисе Рөстәм Миңнеханов киңәшмәне барлык районнары белән видеоконференцэлемтә режимында  үткәрде. Киңәшмәдә шулай ук ТР Премьер-министры Алексей Песошин да катнашты.

Әйтик, бүгенге көндә республикада 2 466 котельная эшли башлаган, бу 77% тәшкил итә.

9 853 күп фатирлы йорт җылытыла - бу республикадагы торак фондының 55%ы.

Шулай ук 1 604 сәламәтлек саклау объектына (бу 81%), 2 809 мәгариф объектына (86%), 1 211 мәдәният объектына (63%), 229 спорт һәм яшьләр объектына (яки тармак объектларының гомуми санының 63%ына), 124 социаль яклау объектына (75%ына) җылылык җибәрелгән.