Яшел Үзән муниципаль районы башлыгы итеп Александр Тыгин сайланды

Бүген Яшел Үзән муниципаль районы Советының 33 нче сессиясендә Александр Тыгин Яшел Үзән районы башлыгы итеп сайланды. Александр Тыгин кандидатурасы өчен Совет утырышында катнашучы 47 депутатның 46 сы яшерен тавыш бирү ысулы белән үзләренең тавышларын биргәннәр.

Яшел Үзән муниципаль районы Советының 33 нче сессиясе эшендә Татарстан Премьер-министры Илдар Халиков, ТР Дәүләт Советы Рәисе урынбасары Александр Гусев, ТР Муниципаль берәмлекләре советы рәисе Минсәгыйть Шакиров һ.б. катнашты.

Яшел Үзән муниципаль районы башлыгы урынбасары Фоат Шәмсиев хәбәр иткәнчә, Совет утырышында 52 депутатның 47се катнаша. Соңыннан депутатлар секретариат, хисап төркемен сайладылар, Яшел Үзән районы башлыгы кандидатурасына тавыш бирү өчен бюллетеньнәрне расладылар.

Фоат Шәмсиев белдергәнчә, 2013 елның 8 нче сентябрендә Татарстан Республикасында өстәмә җирле үзидарә органнары депутатларын сайлаулар булды. Александр Тыгин Яшел Үзән муниципаль районы Советы депутатлары составына кергән, ул Яшел Үзән мэры итеп сайланган. Соңыннан Александр Тыгин Яшел Үзән муниципаль районы башлыгы вазифасына чыгарылган.

ТР Премьер-министры Илдар Халиков депутатларга мөрәҗәгать итеп, сайлауларны яхшы оештырган өчен, барысына да рәхмәт белдерде. Райондагы хәлдән канәгать булуын, бүгенгә уңай үзгәрешләр күренүен билгеләп үтте. ТР Премьер-министры сүзләренчә, гомумән икътисади һәм сәнәгать предприятиеләренең хәле яхшырды, бу үсештә “Ак Барс” холдинг компаниясе шактый ярдәм итә. Моннан тыш, районда яңа эш урыннары булдырыла, Яшел Үзән федераль һәм республика программаларын тормышка ашыруда актив катнаша.

Аннан соң депутатлар Яшел Үзән муниципаль районы башкарма комитеты җитәкчесе вазифасына конкурс игълан итү өчен, шулай ук башкарма комитет җитәкчесе вазифаларын Сергей Егоровка (бүгенге көнгә кадәр ул Яшел Үзән муниципаль районы башкарма комитеты җитәкчесенең беренче урынбасары булган) йөкләүләре өчен тавыш бирделәр.