Татарстан урманчылары һөнәри бәйрәмнәрен билгеләп үттеләр

Бүген К.Тинчурин исемендәге Татарстан дәүләт драма һәм комедия театрында Урман хезмәткәрләре көненә багышланган тантаналы чара булды. Анда ТР Премьер-министры Илдар Халиков, республиканың урман хуҗалыгы министры Наил Мәһдиев катнашты.

ТР Хөкүмәте башлыгы билгеләгәнчә, Татарстанда һәрвакыт урман тармагына игътибар бирелде. “Ләкин соңгы елларда бирелә торган игътибар һәм тармакта булган үзгәрешләр куандырмыйча калмый, - дип ассызыклады Илдар Халиков. – Бүген республикада урман тармагы – урманны саклау һәм яңарту гына түгел, ә яңа технологияләр дә”. Аның сүзләренчә, бүген Татарстанның урман тармагы хезмәткәрләренә, тәҗрибә уртаклашыр һәм өйрәнер өчен, Россиянең төрле төбәкләреннән һәм чит илдән коллегалары килә.

И.Халиков, бик күп еллар дәвамында янгын чыгу куркынычы булган чорларда урманнарны саклый алган һәм күп еллар дәвамында ТР урманын саклый алырлык янгын куркынычсызлыгын тәэмин итү системасын булдырган өчен, республиканың урман тармагы хезмәткәрләренә рәхмәт белдерде.

ТР Премьер-министры чыгышында искәртеп үткәнчә, күптән түгел Саба муниципаль районында түбән сортлы агачны эшкәртү буенча агач эшкәртү комплексы ачылды. Шулай ук И.Халиков урман тармагы хезмәткәрләренең Универсиадага әзерлек эшендә ярдәм итүләрен билгеләде.

“Без, шул исәптән, республика Татарстанда барган инновацион процесслар белән бергә атларга тырышабыз, - диде ТР урман хуҗалыгы министры Наил Мәһдиев, коллегаларын бәйрәм белән котлап. - ТРда тормышка ашырылган һәм тормышка ашырыла торган зур һәм дөнья дәрәҗәсендәге проектлар моңа дәлил булып тора”. Н.Мәһдиев ассызыклаганча, Татарстанның урман тармагына горурланырлык урын бар. Ләкин болар барысына урман тармагы җитәкчеләре буыны салган нигездән башка ирешеп булмас иде, дип ышана ТР Урман хуҗалыгы министрлыгы башлыгы.

ТР Президенты биреме ярдәмендә республика урманчылары үзләре өчен яңа булган эштә – Казанның тарихи үзәгендәге Иске татар бистәсен торгызуда катнаша алдылар, диде ведомство башлыгы.

Шулай ук тантана вакытында Урман хуҗалыгы федераль агентлыгы, ТР Хөкүмәте, ТР Урман хуҗалыгы министрлыгы бүләкләре тапшырылды. Бүләкләрне ТР Премьер-министры Илдар Халиков, республиканың урман хуҗалыгы министры Наил Мәһдиев тапшырды.

Бәйрәмнең рәсми өлеше төгәлләнгәннән соң, ТР урман тармагы хезмәткәрләренә К.Тинчурин театрының “Мәхәббәт чишмәсе” спектакле күрсәтелде.