Илдар Халиков Вьетнамның Хәрби диңгез флоты башкомандующие, милли оборона министры урынбасары Нгуен Ван Хиен белән очрашты

Бүген Татарстан Республикасы Премьер-министры Илдар Халиков Вьетнамның Хәрби диңгез флоты башкомандующие, милли оборона министры урынбасары Нгуен Ван Хиен җитәкчелегендәге Вьетнам Социалистик Республикасы делегациясе белән очрашты.

Очрашу ТР Хөкүмәте Йортында узды, анда шулай ук Горький исемендәге Яшел Үзән заводы генераль директоры Ренат Мистахов, “Ак Барс” холдинг компаниясе генераль директоры Иван Егоров һ.б. катнашты.

Илдар Халиков кунакларга, бүген чит илдә командировкада булган ТР Президенты Рөстәм Миңнеханов исеменнән сәламләү сүзләрен җиткерде.

ТР Премьер-министры республиканың икътисади потенциалы турында кыскача сөйләде, монда оборона-сәнәгать комплексының зур өлеше туплануын әйтеп узды. Бу- 13 зур сәнәгать предприятиесе, 20дән артык фәнни-тикшеренү институтлары һәм конструкторлык бюролары. Татарстанда авиа- һәм суднолар төзелеше, сугыш кирәк-яраклары, махсус химия продукциясе җитештерелә, дип хәбәр итте Илдар Халиков.
Оборона-сәнәгать комплексы предприятиеләре составына С.П.Горбунов исемендәге Казан авиация җитештерү берләшмәсе, Казан вертолет заводы, “Серго исемендәге завод” җитештерү берләшмәсе, шулай ук Горький исемендәге Яшел Үзән заводы керә.

Илдар Халиков Вьетнам коллегаларына хезмәттәшлек өчен рәхмәт әйтте һәм бу эшлекле очрашуның Татарстан Республикасы белән мөнәсәбәтләр үсешенә яңа этәргеч бирүенә ышанычын белдерде. Ул шулай ук Вьетнам белән хезмәттәшлектә Россиянең Сәнәгать һәм сәүдә министрлыгы, Рособоронэкспорт структурасы ярдәм итүен җиткерде.
Илдар Халиков хәбәр иткәнчә, иртәгә ике “Гепард-3.9” фрегатына нигез салыначак, алар Вьетнам өчен “Яшел Үзән проект-конструкторлык бюросы” ААҖдә проектлаштырылган.

Үз чиратында, Вьетнамның Хәрби диңгез флоты башкомандующие, милли оборона министры урынбасары Нгуен Ван Хиен, ярдәм итүләре өчен Татарстанга рәхмәт белдерде.
Без партнерлыкны сакларга телибез һәм киләчәктәге хезмәттәшлек өчен күп мөмкинлекләр күрәбез, диде ул.


Белешмә өчен:

2013 елның 24 сентябрендә “А.М. Горький исемендәге Яшел Үзән заводы” ААҖ дә (предприятие “Ак Барс” холдинг компаниясе” ААҖ компанияләр төркеменә керә), Вьетнам өчен “Яшел Үзән проект-конструкторлык бюросы” ААҖ дә проектлаштырылган ике “Гепард-3.9” фрегатына нигез салу тантанасы булачак.