Татарстан Президенты француз компанияләре вәкилләре белән очрашты

Бүген Татарстан Республикасы Президенты Рөстәм Миңнеханов Сочидагы халыкара инвестицион форум кысаларында Франция-Россия сәүдә-сәнәгать палатасы (CCIFR) президенты Эммануэль Киде җитәкчелегендәге француз компанияләре вәкилләре белән очрашты. Татарстан Республикасы стендында булып узган әлеге очрашуда шулай ук “Татнефть” ААҖ генераль директоры Шәфәгать Тәһәветдинов, Татарстан Республикасы Президентының икътисадый мәсьәләләр буенча ярдәмчесе Айрат Хәйруллин катнашты.

Очрашуны ачып, Татарстан Президенты билгеләп үткәнчә, кайбер француз компанияләре республикада уңышлы эшләп килә. Бу, аерым алганда, Air Liquid компаниясе, сәүдә челтәрләре, банклар. "Без үзара файдалы мәнфәгатьләр, контактлар эзлибез һәм сезнең белән очрашып агымдагы проектлар турында фикер алышу мөмкинлегенә шатбыз", - дип мөрәҗәгать итте Рөстәм Миңнеханов бизнесменнарга.

Очрашу барышында эшкуарлар Татарстан ягына монорельс проектын тәкъдим иттеләр, ул вокзалны метро станциясе белән тоташтырачак. Рөстәм Миңнеханов бу проектны карарга вәгъдә итте. "Леруа Мерлен" сәүдә челтәре вәкилләренә Татарстан Республикасы Президенты Әлмәткә бик перспективалы шәһәр буларак игътибар итәргә киңәш бирде. "Кибетегез бик әйбәт, ассортиментыгыз бик яхшы, Әлмәттә сез кирәкле булачаксыз", - диде Рөстәм Миңнеханов.

Шулай ук француз бизнесменнары энергетика өлкәсендә үз хезмәт күрсәтүләрен тәкъдим иттеләр. Рөстәм Миңнеханов бу өлкәдәге хезмәттәшлекнең перспективалары турында җентекләбрәк Татарстанның шул юнәлештәге структуралары белән фикер алышырга тәкъдим итте.