Татарстан Премьер-министры Гомумроссия ветераннар оешмасы рәисе белән очрашты

Бүген Татарстан Премьер-министры Илдар Халиков “Россия ветераннар берлеге” Гомумроссия ветераннар иҗтимагый оешмасы рәисе – армия генералы Михаил Моисеев белән очрашты.

ТР Хөкүмәт йортында узган очрашуда шулай ук ТР Сугыш һәм хәрби хезмәт ветераннары иҗтимагый оешмасы рәисе Әхәт Юлашев, ТР хезмәт, мәшгульлек һәм социаль яклау министры урынбасары Ирина Просвирякова, “ РФ Оборона министрлыгының Казан суворов хәрби училищесе” җитәкчесе Владимир Чайников һәм ТР Министрлар Кабинеты Аппаратының социаль үсеш идарәсе җитәкчесе Гүзәл Шакирова катнашты.

Очрашуда барышында армия генералы Михаил Моисеев Россия ветераннар берлеге эшчәнлеге һәм оешма тормышка ашыра торган проектлар турында сөйләде. Ул бу оешманың быелгы елның апреленнән хәзерге исемдә атала башлавын искә төшерде. Оешманың перспективалы бурычлары – фронтовикларны кайгырту, Ватанны саклаганда һәлак булганнарның исемнәрен мәңгеләштерү, яшьләргә хәрби-патриотик тәрбия бирү һ.б.

Ике яктан да катнашучылар бүгенге очрашуда быел октябрьдә Казанда булачак Россия ветераннар берлегенең гомумроссия конференциясен оештыру һәм уздыру мәсьәләләре буенча фикер алыштылар.