Иннополиста Россия Сәнәгать һәм сәүдә министрлыгы делегациясе булды
Татарстан Республикасы Премьер-министры урынбасары Роман Шәйхетдинов Иннополиста Төбәк сәнәгать сәясәте департаменты директоры Иван Куликов җитәкчелегендәге Россия Сәнәгать һәм сәүдә министрлыгы делегациясе белән очрашты. Очрашуда шулай ук «Иннополис» МИЗ генераль директоры Ренат Хәлимов катнашты.
Яклар югары технологияле тармаклар өлкәсендә «Иннополис» инновацион үзәгенең җитештерү секторы үсешенә бәйле хезмәттәшлек юнәлешләре турында фикер алыштылар.
Россия Сәнәгать һәм сәүдә министрлыгы командасына Иннополис шәһәре һәм Иннополис университеты мөмкинлекләрен тәкъдим иттеләр. Шулай ук алар «Лаеш» индустриаль паркында һәм «ИнноПарк» югары технологияләр өлкәсендәге технопаркта «Иннополис» махсус икътисади зонасы мәйданчыкларында үсеш алган югары технологияле җитештерүләр белән таныштылар.
«Лаеш» индустриаль паркында микроэлектроника кластерын булдыру буенча эш алып барыла. Делегация ICL ана платаларын өстән-өстән монтажлау заводында булды, анда башлангыч этапта елына 300 мең ана платасы ясалачак, аннан соң 1 миллионга кадәр эшләнмәләр арттырылачак.
Югары технологияләр өлкәсендә Россия технопарклары реестрына беренче булып кергән «Иннопарк» та Иван Куликов технопаркта Иннополис университеты алып барган фәнни-тикшеренү эшчәнлеге, шулай ук дронопортлар җитештерү, биналар һәм корылмалар төзүне тизләтү өчен төзелешне автоматлаштыру, конвейер системаларын эшләү буенча махсус икътисадый зона резидентлары проектлары белән танышты.