Илдар Халиков Kazansummit форумында катнашучылар белән хезмәттәшлек мөмкинлекләре турында фикер алышты

Бүген Татарстан Республикасы Хөкүмәте рәисе Илдар Халиков Россия һәм Ислам хезмәттәшлеге илләренең Kazansummit´13 халыкара икътисади форумы кысаларында эшлекле очрашулар уздырды. Ул “Форс” компаниясе төркемнәре Директорлар Советы рәисе Сергей Матвиенко һәм Төркиянең Bortech компаниясе генераль директоры Орхан Ихсаноглу белән хезмәттәшлек перспективлары турында фикер алышты.

“Форс” компаниясе төркемнәре төзелеш, IT өлкәсендә хезмәт күрсәтү тәкъдим итә. ТР Премьер-министры Илдар Халиков Директорлар Советы рәисе Сергей Матвиенконы сәламләп, “Форс” төркеме белән республиканың үзара эшчәнлеге дәвам итә, дип белдерде. “Хезмәттәшлек итү өчен яңа, кызыклы юнәлешләр барлыкка килә. Аеруча шатландырганы, бу юнәлеш – мәгълүмат технологияләре”,- дип билгеләде Илдар Халиков.

Сергей Матвиенко сөйләвенчә, “Форс” компаниясе Oracle компаниясе продуктларының системалы интеграторы булып тора. “Форс” бу хезмәтләрне Татарстанга тәкъдим итәргә әзер.

Илдар Халиков хәзер Татарстанда нинди системаларның Oracle да эшләве белән кызыксынды. Белгечләр сүзләренә караганда, Универсиада системалары Oracle белән эшләгән, шулай ук компания продуктлары электрон документ әйләнеше мәгълүмат базасы белән идарә итә.

ТР Хөкүмәт башлыгы Сергей Матвиенкога “Форс” компаниясенең республика Мәгълүматлаштыру һәм элемтә министрлыгы белән хезмәттәшлек итү перспективалары турында җентекләп фикер алышырга тәкъдим итте. Ул шулай ук компания вәкилләрен Иннополис һәм “Смарт Сити Казан” проектларына кабат, тагын да игътибар белән карарга чакырды.

“Bortech” компаниясе генераль директоры Орхан Ихсаноглу Илдар Халиковка республиканың төзелеш комплексында компания җитештерә торган махсус янгынга чыдамлы лак-буяу куллану мөмкинлеген карарга тәкъдим итте. ТР Хөкүмәт рәисе, мондый буяуларны киң куллану өчен янгын куркынычсызлыгы белән шөгыльләнүче органнарда тиешле сертификациянең булуы таләп ителә, диде. “Сертификациянең булуы бик мөһим, ул күп проектларга юл ача”, - дип белдерде Илдар Халиков.

Бер үк вакытта ул Орхан Ихсаноглуга Татарстанда Bortech буяуларын куллану мөмкинлеген “Татинвестгражданпроект” институты җитәкчелеге белән җентекләп сөйләшүне тәкъдим итте.