ТР Премьер-министры Казанның Федосеев паркында чыршылар утыртты

Бүген Татарстанда традицион “Урман утырту көне” табигатьне саклау акциясе уза. Күп кенә дәүләт учреждениеләре, министрлыклар, ведомстволар, ТР Президенты Аппараты һәм республика Хөкүмәте хезмәткәрләре, вуз студентлары һәм укытучылары Казан территориясендә агачлар утыртуда катнаша.

Аерым алганда, бүген Игенчеләр сарае каршындагы Федосеев паркында ТР Хөкүмәте Аппараты хезмәткәрләре 50 чыршы утыртты. Аларның икесен ТР Премьер-министры Илдар Халиков утыртты. Шулай ук акциядә вице-премьер – ТР Министрлар Кабинеты Аппараты җитәкчесе Шамил Гафаров һәм республиканың урман хуҗалыгы министры Наил Мәһдиев катнашты.

ТР урман хуҗалыгы министры журналистларга искәртеп киткәнчә, республикада “Урман утырту көне” табигатьне саклау акциясе 2011 нче елдан ярты елга бер тапкыр уздырыла (майда һәм октябрьдә). Аерым алганда, агымдагы елның маенда акциядә ТРның 43 муниципаль районнарында 15 меңнән артык кеше катнашты, 268 га мәйданда 1,2 млн. артык агач утыртылды. 3 елда акциянең күрсәткече 984 га мәйданда 3,6 млн.агач булды.

“Утырту материалы Татарстан питомникларыннан алына. Бу безнең климат шартларына җайлашкан нарат, чыршы, каен, балан, юкә”, - дип билгеләде Н.Мәһдиев.

Бүген Казанның 50 мәйданчыгында - шәһәр территориясендә, якындагы территорияләрдәге дәүләт урман фондында - агачлар утыртыла.