Казанда “Дортрансэкспо” күргәзмәсе ачылды

Бүген Казанда “Дортрансэкспо”ның 13 махсуслаштырылган күргәзмәсе ачылды. Анда төзелеш, автомобиль юлларын тоту һәм ремотлау, юл инфраструктурасы объектларын төзү өчен иң яңа җиһазлар күрсәтелгән. Барлыгы күргәзмәдә Татарстаннан, Россиянең башка төбәкләреннән, якын һәм ерак чит илләрдән 90 компания катнаша. Күргәзмә кысаларында ТР Транспорт һәм юл хуҗалыгы министрлыгы коллегиясенең утырышы узды. Анда Татарстан Премьер-министры Илдар Халиков катнашты.

Ачылыш тантанасында чыгыш ясап, Илдар Халиков, күргәзмәдә бары тик идея һәм проектлар гына түгел, ә бәлки гамәлдә булганнарының да күрсәтелүе белән әһәмиятле, дип ассызыклады. “Бүген Казан һәм Татарстан – ачык мәйданчык. Юлларда, күперләр аша чыкканда, җәяүлеләр сукмакларында берничә ел элек, хәтта бер ел элек кенә шушы күргәзмәләрдә күрсәтелгәннәрне күрергә мөмкин”, -диде ул

ТР Премьер-министры күргәзмәдә катнашучыларга форум нәтиҗәләре буенча яңа контрактлар имзалануын, яңа партнерлык мөнәсәбәтләренең урнашуын, транспорт инфраструктурасының яңа сыйфатлы объектлары барлыкка килүен теләде.

ТР транспорт һәм юл хуҗалыгы министры Ленар Сафин күргәзмәдә катнашучыларны киләчәктәге һөнәри бәйрәмнәре – Юл хуҗалыгы һәм автомобиль транспорты хезмәткәрләре көне белән котлады.