ТР Премьер-министры ТР буенча Эчке эшләр министрлыгы кинология хезмәтенең зональ үзәгендә булды

Бүген Казанда Татарстан Республикасы Хөкүмәте башлыгы Илдар Халиков Россия Эчке эшләр министрлыгының җәмәгать тәртибен саклауны һәм РФ субъектлары башкарма хакимияте белән багланышларны координацияләү буенча баш идарәсе җитәкчесе Юрий Демидов белән бергә Казанда ТР буенча Эчке эшләр министрлыгы кинология хезмәтенең зональ үзәгендә булды. Шулай ук үзәктә ТР Президенты Аппараты җитәкчесе Әсгать Сәфәров, ТР буенча эчке эшләр министры Артем Хохорин һәм ТР буенча баш федераль инспектор Ренат Тимерҗанов булды.

Үзәк башлыгы Валерий Ушатов кунакларга сөйләгәнчә, бу үзәктә Татарстандагы кинология хезмәтенең барлык хезмәткәрләрен координацияләү бара, әлеге хезмәткәрләр Эчке эшләр министрлыгының республика районнары бүлекләрендәге 4 үзәк һәм 14 төркемдә һәм юнәлештә хезмәт итә.

Хәзерге вакытта, В.Ушатов сүзләренчә, Республика кинология хезмәте карамагында 480 эт бар, алар патруль-пост хезмәтендә, полиция бүлекләрендә транспортта файдаланыла, шартлаткыч һәм башка тыелган матдәләрне, коралларны һәм сугыш кирәк-яракларын эзләү белән шөгыльләнә.

Илдар Халиков һәм Юрий Демидов этләр яши торган вольерларны карадылар, этләрне тыелган һәм шартлаткыч матдәләрне эзләргә өйрәтә торган уку-укыту үзәгендә булдылар.

Кунакларга иң заманча медицина җайланмалары белән җиһазландырылган ветеринария блогын күрсәттеләр. Илдар Халиков һәм Юрий Демидов үзәкнең җиһазландырылу дәрәҗәсен югары бәяләделәр һәм аның хезмәткәрләренә киләчәктә уңышлар теләделәр.