Казанда француз импрессионистлары эшләре күргәзмәсе ачылды

Казанда Россия мәдәният министры Владимир Мединский һәм Дәүләт эрмитажы директоры Михаил Пиотровский катнашуында “Француз импрессионистлары һәм аларның эпохасы” исемендә бердәнбер күргәзмә ачылды. Күргәзмәнең рәсми ачылышында ТР Дәүләт Киңәшчесе Минтимер Шәймиев, ТР Премьер-министры Илдар Халиков,ТР мәдәният министры Айрат Сибагатуллин һәм “Казан Кремле” музей-саклаулыгы директоры Зилә Вәлиева катнашты. Аларның һәркайсы күргәзмәнең Казан өчен генә түел, ә бәлки Россия һәм бөтен дөнья өчен аеруча мөһимлеген белдерделәр.

“Эрмитаж-Казан” үзәгендә киләсе елның 25 февраленә кадәр атаклы рәссамнарның эшләре күрсәтеләчәк.

Журналистлар белән очрашуда Михаил Пиотровский, бу күргәзмәнең, Казанда Эрмитажның 17 нче күргәзмә проекты булуын сөйләде. Бүген ачылган экспозиция Амстердамда күрсәтелгән булган, анда аны якынча 200 мең кеше караган. Дәүләт Эрмитажы директоры күргәзмәне “бердәнбер, искиткеч, сирәк һәм акыллы”, дип атады.

Экспозициядә рәсемнәрдән тыш, XIX йөз ахыры француз басма графикасының ачык әсәрләре кергән. Берничә залда декоратив-кулланма сәнгать истәлекләре куелган.

Күргәзмәнең кураторы – Эрмитажның көнбатыш Европа сынлы сәнгате бүлеге фәнни хезмәткәре Наталья Демина аның концепциясе турында сөйләде. Күргәзмә импрессионистлар иҗат иткән эпоха рухына туры килә.

Киләсе елда Дәүләт Эрмитажына 250 ел тула. Бу вакыйга хөрмәтенә бик күп кызыклы күргәзмә проектлары әзерләнәчәк. Михаил Пиотровский очрашуда Эрмитаж филиалларын ачу өчен Омск һәм Владивосток белән сөйләшүләр алып барылуы турында белдерде. Хәзер Россиядә бу музейның бары тик ике филиалы бар – Казан һәм Выборгта.