Илдар Халиков Социаль иминият фонды җитәкчесе белән очрашты

Бүген Татарстан Республикасы Премьер-министры Илдар Халиков Россия Федерациясе Социаль иминият фонды рәисе Андрей Кигим белән очрашты. Очрашу ТР Хөкүмәте Йортында узды.

Казанда Андрей Кигим “Эшкә яраклы булмау турында электрон бит” пилот проекты” семинарында катнаша. Анда катнашучылар төбәкләрнең эшкә яраклы булмау турында электрон бит кертүгә әзерлеген тикшерәчәк һәм пилот проектын оештыру мәсьәләләре турында алышачаклар. Бүген IT-паркта узачак семинарда ТР Премьер-министры урынбасары – мәгълүматлаштыру һәм элемтә министры Роман Шәйхетдинов, Социаль иминият фонды үзәк аппараты, башкарма хакимиятнең федераль һәм төбәк органнары, Россия сәнәгатьчеләр һәм эшмәкәрләр берлеге вәкилләре катнаша.

Россия өчен уникаль булган проектның төп бурычы – вакытлыча эшкә яраклы булмаучыларга пособие билгеләү, исәпләү һәм түләү кысаларында электрон элемтәгә күчү.

“Безнең өчен мондый чараларның Татарстанда узуы мөһим, чөнки мәгълүмат технологияләрен кертү – безнең стратегия”, - дип белдерде бүген Илдар Халиков.

Илдар Халиков Андрей Кигимга Татарстанда электрон дәүләт хезмәтләре кертелү хакында белдерде. ТР Премьер-министры сүзләренчә, хәзер Интернет һәм башка электрон формада ай саен 2 миллионга якын хезмәт күрсәтелә, алардан яшьләр белән бергә өлкән буын кешеләр дә актив куллана.

Очрашу барышында анда катнашучылар Татарстанда Социаль иминият фондының эше, республика белән Россия Социаль иминият фонды хезмәттәшлегенең мөмкин булган яңа юнәлешләре хакында фикер алыштылар.